Հայաստանի կառավարությունը 80 մլն դրամ է հատկացրել տեղեկատվական տեխնոլոգիաների ոլորտի խթանման ծառայությունների 2014թ. ծրագրի համար

ԵՐԵՎԱՆ, 3 ապրիլի. /ԱՌԿԱ/. Հայաստանի կառավարությունը հինգշաբթի նիստում 80 մլն դրամ է հատկացրել տեղեկատվական տեխնոլոգիաների ոլորտի խթանման ծառայությունների 2014թ. ծրագրի համար։
 
Ինչպես որոշման նախագիծը ներկայացնելիս նշեց էկոնոմիկայի նախարար Վահրամ Ավանեսյանը, 2014թ. կանցկացվեն արդեն ավանդական դարձած «Դիջիթեք» ցուցահանդեսը, «Դիջիթեք բիզնես ֆորում 2014», «Արմթեք 2014» համաժողովները և այլն:

«Այդ միջոցառումները միտված են ցուցադրել հայկական ՏՏ ոլորտի նվաճումները, կառավարության, մասնավոր հատվածի, գիտական և կրթական հաստատությունների և դոնոր կազմակերպությունների համագործակցության, միասնության և համատեղ ջանքերի արդյունքները»,- ասաց նախարարը:

2000 թվականին Հայաստանի կառավարությունը ՏՏ ոլորտը հայտարարեց երկրի տնտեսության գերակա ոլորտ։ Այսօր Հայաստանի ՏՀՏ ոլորտում գործում է մոտ 350 ձեռնարկություն, որտեղ աշխատում է շուրջ 10 հազար աշխատակից։

Ըստ Ինֆորմացիոն տեխնոլոգիաների ձեռնարկությունների միության (UITE) տվյալների, Հայաստանում 2012թ.–ի արդյունքներով ՏՏ ոլորտի աճը կազմել է 25 տոկոս` 250 մլն դոլար շրջանառությամբ։ –0–

Ծանոթացեք լուրերին առաջինն ու քննարկեք դրանք մեր Telegram-ում

18:38 03.04.2014