Ամերիկան հետևողական է Հայաստանի ՏՏ ոլորտին աջակցելու հարցում. դեսպան
ԵՐԵՎԱՆ, 4 հոկտեմբերի. /ԱՌԿԱ/. ԱՄՆ–ն հետևողական է Հայաստանի տեղեկատվական տեխնոլոգիաների ոլորտին աջակցելու հարցում, ուրբաթ Երևանի ArmTech միջազգային կոնգրեսի ընթացքում հայտնեց Հայաստանում ԱՄՆ արտակարգ և լիազոր դեսպան Ջոն Հեֆերնը։
«Ես շատ ուրախ եմ Հայաստանում տեսնել այդքան ամերիկյան ընկերություններ։ Ես լիահույս եմ և հավատում եմ Հայաստանի տեխնոլոգիական ոլորտի ապագային։ Ամերիկացի ժողովուրդը ուրախ է մասնակցել Հայաստանի ՏՏ ոլորտի կայացման գործընթացին»,– ասաց Հեֆերնը։
Դեսպանը ներողություն է խնդրել հակիրճ լինելու համար` կատակելով, որ Վաշինգտոնում «փոքր խնդիր» կա, ինչի հետ կապված` ինքը պարտավոր է հնարավորինս կրճատել իր գործունեությունը։
2014 ֆիսկալային տարվա բյուջեի վերաբերյալ ԱՄՆ կոնգրեսի տարաձայնությունները հանգեցրեցին նրան, որ դաշնային հաստատությունների մեծ մասը դադարեց աշխատել 2013թ.–ի հոկտեմբերի 1–ից։
ArmTech տեխնոլոգիական միջազգային վեցերորդ կոնգրեսն անցնում է ուրբաթ Երևանում։
Առաջին ԱրմԹեք Համաժողովն անցկացվել է 2007թ. ԱՄՆ-ի Կալիֆորնիա նահանգի Սան-Ֆրանցիսկո քաղաքում, որին հաջորդել են համաժողովներ Երևանում 2008-ին և 2011-ին և Սիլիկոնյան հովտում ՝ 2009-ին և 2012-ին:
2000 թվականին Հայաստանի կառավարությունը ՏՏ ոլորտը հայտարարեց երկրի տնտեսության գերակա ոլորտ։ Այսօր Հայաստանի ՏՀՏ ոլորտում գործում է մոտ 350 ձեռնարկություն, որտեղ աշխատում է շուրջ 10 հազար աշխատակից։
Ըստ Ինֆորմացիոն տեխնոլոգիաների ձեռնարկությունների միության (UITE) տվյալների, Հայաստանում 2012թ.–ի արդյունքներով ՏՏ ոլորտի աճը կազմել է 25 տոկոս` 250 մլն դոլար շրջանառությամբ։ –0–
Ծանոթացեք լուրերին առաջինն ու քննարկեք դրանք մեր Telegram-ում
17:12 04.10.2013