ՀՀ վարչապետը Ոստիկանությանն առաջարկել է օգտագործել երիտասարդ մասնագետների տեխնոլոգիական մշակումները
ԵՐԵՎԱՆ, 29 նոյեմբերի. /ԱՌԿԱ/. ՀՀ վարչապետ Տիգրան Սարգսյանը հինգշաբթի կայացած կառավարական նիստի ժամանակ Ոստիկանությանն առաջարկել է օգտագործել սթարթափ-ընկերությունների նոր մշակումները:
«Նախօրեին Microsoft ՏՏ ակադեմիայի բացման ժամանակ սթարթափ-բիզնեսի ներկայացուցիչները պատմեցին իրենց մշակումների մասին: Մասնավորապես երիտասարդ մասնագետները հետաքրքիր արտադրանք են առաջարկում, որը թույլ կտա տուգանքի մասին հաղորդագրություն ուղարկել վարորդին հեռախոսի միջոցով»,- ասաց վարչապետը:
Ըստ նրա, այդ դեպքում վերջինը ոչ միայն իմանում է, որ իր խախտումն արձանագրվել է, այլև` թե որքան է վճարելու:
«Ծրագիրն արդեն պատրաստ է, մնում է այն ներառել տվյալների շտեմարան»,- ասաց կառավարության ղեկավարը:
Նա նշեց, որ համանման ծրագիր է մշակվել նաև գյուղացիների համար: Մասնավորապես մշակումը թույլ է տալիս գյուղացիներին հեռախոսի միջոցով տեղեկություն ստանալ և փոխանցել՝ գյուղատնտեսական ապրանքների առաջարկի և պահանջարկի վերաբերյալ:
ՀՀ ոստիկանության պետի տեղակալ Արթուր Օսիկյանն իր հերթին տեղեկացրեց, որ նման առաջարկ ոստիկանությունում ստացվել է մի քանի ամիս առաջ: «Դա հետաքրքիր առաջարկ է, այն պետք է քննարկել: Անհրաժեշտ է պարզաբանել, թե արդյո՞ք օրենսդրական կարգավորման անհրաժեշտություն կա»,- ասաց Օսիկյանը:
Նա ավելացրեց, որ նման նորամուծությունը վարորդների շահերից է բխում:
Այսօր Ոստիկանությունը տուգանքների մասին տեղեկությունները տարածում է փոստի միջոցով: -0-
Ծանոթացեք լուրերին առաջինն ու քննարկեք դրանք մեր Telegram-ում
14:59 29.11.2012