Հայաստանում մարտի 12–ին մեկնարկում է ArmNet Awards 2015 մրցույթի մասնակցության հայտերի ընդունումը
ԵՐԵՎԱՆ, 12 մարտի. /ԱՌԿԱ/. Հայաստանում մարտի 12–ին մեկնարկում է հայկական կայքերի և բջջային հավելվածների ArmNet Awards 2015 հինգերորդ մրցույթի մասնակցության հայտերի ընդունումը, հինգշաբթի լրագրողներին ասաց Maeutica բրենդային գործակալության տնօրեն Հայկուհի Տաքսիլդարյանը։
Նախագծի նպատակն է բացահայտել հայ և օտարերկրացի մշակողների կողմից ստեղծված լավագույն նախագծերը և պարգևատրել դրանց հեղինակներին։
«Այս տարի մրցույթի շրջանակում կիրականացվի երկու նախագիծ` մրցանակաբաշխություն և միջազգային կոնֆերանս։ Պրոֆեսիոնալ ժյուրիի անդամները կգնահատեն բոլոր ներկայացված աշխատանքները և մարտի 30–ին կհայտարարեն թեկնածուներին, իսկ արդյունքները կամփոփվեն ապրիլի 4–ին։ Այդ օրը տեղի կունենա նաև կոնֆերանսը», – ասաց Տաքսիլդարյանը։
Նրա խոսքերով` «Ինտերնետի և բջջային հավելվածների միտումները 2015» թեմայով կազմակերպվող կոնֆերանսի ընթացքում նախատեսված են ՏՏ, խաղերի և բջջային հավելվածների ոլորտի ինչպես տեղական, այնպես էլ օտարերկրյա մասնագետների ելույթները։
Մասնավորապես, նախատեսված են MediaRu ընկերության գլխավոր տնօրեն Ալեքս Նոսովի, Pediatr 24/7 շարժական հավելվածների ղեկավար Դենիս Յուդչիցի, ինչպես նաև FrooZoo և Getmyway նախագծերի ներկայացուցիչների ելույթները։
Տաքսիլդարյանի խոսքերով` մասնակիցները կպայքարեն «Դիզայն և հարմարավետություն», «Նորարարություն», «Լավագույն կոնտենտ», «Հասարակական ազդեցություն» անվանակարգերում, գլխավոր մրցանակները կհանձնվեն «Լավագույն շարժական հավելված»–ի և «Լավագույն վեբ կայք»–ի համար։
«Մրցույթին կմասնակցեն միջազգային մասնագետներ։ Այս տարի մրցույթի նպատակն է ոչ թե հրավիրել հայտնի մարդկանց, այլ` պարզապես մասնագետների հաջողակ start-up ընկերություններից, քանի որ հայ մասնագետները փորձի փոխանակման կարիք ունեն», – նշեց Տաքսիլդարյանը։
Orange Armenia ապրանքանիշի հաղորդակցության և զարգացման գծով տնօրեն Արամ Մկրտչյանն իր հերթին նշեց, որ հայտերի ընդունման վերջնաժամկետն է մարտի 26–ը` ժամը 18։00–ն։
ArmNet Awards հայկական կայքերի առաջին մրցույթն անցկացվել է 2010 թվականին։
Մրցույթին մասնակցել է մոտ 600 կայք, ևս մոտ 400–ը գրանցման ժամկետի ավարտից հետո են հայտ ներկայացրել և այդ պատճառով չեն ընդգրկվել մրցույթին մասնակցած ռեսուրսների ցուցակում։ ArmNet Awards մրցույթի գրան–պրին շնորհվել է Սերգեյ Փարաջանովի տուն–թանգարանին։
ArmNet միջազգային ամենամյա մրցույթի կազմակերպիչներն են Maeutica բրենդինգային գործակալությունը, Orange Armenia բջջային օպերատորը և «Ինտերնետ Հանրություն» հայկական հասարակական կազմակերպությունը։ Միջոցառման տեղեկատվական հովանավորը telecom.arka.am լրատվական պորտալն է։
Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում) ($1 - 481,53 դրամ)։–0–
Ծանոթացեք լուրերին առաջինն ու քննարկեք դրանք մեր Telegram-ում
18:12 12.03.2015