Հայաստանը 2016թ.–ին Seedstars մրցույթում կներկայացնի տեսողության ստուգման և լավացման Eye Care Plus ստարտափը
ԵՐԵՎԱՆ, 29 մայիսի. /ԱՌԿԱ/. Հայաստանը ստարտափ ընկերությունների համար նախատեսված Seedstars World միջազգային մրցույթում 2016թ.–ին կներկայացնի տեսողության ստուգման և լավացման Eye Care Plus հավելվածը։
Eye Care Plus–ը լավագույնն է ճանաչվել հայկական ստարտափերի շարքում մայիսի 28–ին անցկացված ազգային ընտրական մրցույթի ընթացքում և երկիրը կներկայացնի Շվեյցարիայում կայանալիք միջազգային մրցույթում։
Ինչպես նշել է Seedstars World-ի գործադիր տնօրեն Ալիզ Դե Տունակը, Seedstars World-ը բացառիկ հարթակ է, որը կապ է ստեղծում ներդրողների և նորաստեղծ ստարտափերի միջև։
Նա նշել է, որ հեռանկարային ստարտափ ընկերությունները կարող են հայտերի ամբողջական փաթեթ ներկայացնել և մասնակցել մրցույթին։ Հաղթողն իր երկիրը և ստարտափը Շվեյցարիայում ներկայացնելու հնարավորություն կունենա։
«Մեկ տարվա մեր փորձառությունը ցույց է տվել, որ զարգացող երկրներում ամենամեծ արդյունքների կարելի է հասնել` խրախուսելով և ներդրումներ անելով ձեռնարկատիրության մեջ»,– նշել է Դե Տունակը։
Միջոցառման ընթացքում 35 հայցադիմումներից ընտրված 12 ստարտափերը ներկայացրել են իրենց արտադրանքը միջազգային և տեղական մասնագետներից կազմված ժյուրիի անդամներին։
Eye Care Plus անվճար հավելվածը նախատեսված է աչքերի տեսողության ստուգման, մոնիտորինգի և բարելավման համար: Այն ներկայացվել է հայ ծրագրավորողների կողմից 2014թ.–ի մայիսին։ Հավելվածը հնարավորություն է տալիս ստուգել տեսողությունը, օգնում է բացահայտել կարճատեսության, աստիգմատիզմի, դալտոնիզմի և մի շարք այլ հիվանդությունների ախտանշաններն ու կանխել դրանց զարգացումը:
Ծրագրի հիմնական առավելությունն այն է, որ տեսողությունը կարելի է ստուգել ցանկացած հարմար պահի և հարմար վայրում։ Բացի ստուգումից, հավելվածը թույլ է տալիս նաև կատարել պրոցեդուրաներ, որոնք ուղղված են տեսողության լավացմանը։ Այս ծրագրի միջոցով կարելի է նաև իմանալ, թե ինչպես է պետք սնվել տեսողությունը լավացնելու համար կամ ինչ է պետք անել, երբ աչքի մեջ օտար մարմին է ընկնում։
«Eye care Plus» հավելվածը մշակել է «Sourcio» հայկական ընկերությունը և հասանելի է Android և iOS օպերացիոն համակարգերի համար։ Հավելվածը հասանելի է անգլերեն և հայերեն տարբերակներով, և այսօր արդեն այն վերբեռնել են շուրջ տասը հազար անգամ։
«Sourcio» ՓԲԸ–ն զբաղվում է տեղեկատվական տեխնոլոգիաների ոլորտում ծառայություններ տրամադրելով։ «Sourcio»–ի հիմնական արտադրանքն են ծրագրային ապահովումը և կառավարման համակարգերը։
Seedstars մրցույթն առաջին անգամ անցկացվել է Հայաստանում 2014թ.–ին, հաղթող է դարձել SoloLearn թիմը։
Seedstars Yerevan 2015–ի կազմակերպիչներն են Մայքրոսոֆթ ինովացիոն կենտրոնը և Seedstars World–ը։-0-
Ծանոթացեք լուրերին առաջինն ու քննարկեք դրանք մեր Telegram-ում
22:05 29.05.2015