Հայկական տասը ստարտափեր կմասնակցեն IBM ISTC Startup Challenge աքսելերացիոն մրցույթին

ԵՐԵՎԱՆ, 16 մայիսի. /ԱՌԿԱ/. Ձեռնարկությունների ինկուբատոր հիմնադրամը (EIF) և IBM Նորարարական լուծումների և տեխնոլոգիաների կենտրոնը (ISTC) իրականացնում են սկսնակների համար նախատեսված աքսելերացիոն մրցույթ` IBM ISTC Startup Challenge, երկուշաբթի տեղեկացրեցին EIF–ի մամուլի ծառայությունից։

Մրցույթի նպատակն է խթանել ինովացիայի զարգացումը Հայաստանում, աջակցել սկսնակ ընկերություններին և թիմերին` իրենց գաղափարներն ու նախագծերը իրականություն դարձնելու հարցում:

IBM ISTC Startup Challenge-ին մասնակցում են 10 թիմեր, ովքեր ներկայացրել են գաղափարներ արհեստական բանականության, բիզնես անալիտիկայի, վիրտուալ իրականության, Big data և ամպային տեխնոլոգիաների ուղղություններով:

Ապրիլին թիմերի համար իրականացվել են 4 սեմինարներ հետևյալ բովանդակություններով՝ բիզնես գաղափարի ձևավորում և զարգացում, բիզնես Կանվաս և ֆինանսական հիմունքներ, գաղափարի ներկայացում և ստարտափի բրենդավորում։ Թիմերից յուրաքանչյուրին տրամադրվում է անհատական մենթորություն հայաստանյան մասնագետների կողմից:

Բացի այդ, 3-4 լավագույն թիմերի կտրամադրվի անհատական տեխնիկական մենթորություն IBM Watson Europe մասնագետների կողմից։ Մրցույթը տևելու է 10 շաբաթ։ Հունիսի սկզբին տեղի կունենա DemoDay, որի ընթացքում թիմերը կներկայացնեն իրենց ծրագրերը:

Մրցույթի արդյունքում 2 լավագույն թիմեր կստանան 1000 դոլարին համարժեք դրամական մրցանակ, իսկ 1 թիմի կտրամադրվի 120,000 դոլարին համարժեք դրամական մրցանակ` IBM-ի ծառայություններից օգտվելու համար։

IBM ISTC Startup Challenge մրցույթը IBM Նորարարական լուծումների և տեխնոլոգիաների կենտրոնի կողմից սկսնակների աջակցման նախագծերից մեկն է, որին կհաջորդի հուլիսին անցկացվող IBM Watson Hackathon-ը, և սեպտեմբերին կմեկնարկի առաջին ISTC Startup Acceleration ծրագիրը: 2002 թվականից սկսած` իր հիմնադրման առաջին իսկ օրից, Ձեռնարկությունների ինկուբատոր հիմնադրամն աջակցում է Տեղեկատվական տեխնոլոգիաների ոլորտի ընկերություններին, նպաստում ինովացիաների զարգացմանը Հայաստանում։ 14 տարիների ընթացքում իրականացվել են ինովացիոն ոլորտի սկսնակ ընկերությունների ստեղծմանը նվիրված բազմաթիվ ծրագրեր:–0–

Ծանոթացեք լուրերին առաջինն ու քննարկեք դրանք մեր Telegram-ում

19:43 16.05.2016