Հայկական հինգ լավագույն ներդրումային նախագծերը դրամաշնորհներ կստանան STEP ծրագրով
ԵՐԵՎԱՆ, 4 դեկտեմբերի. /ԱՌԿԱ/. Հայկական հինգ լավագույն ներդրումային նախագծերը ֆինանսական աջակցություն կստանան Գիտական և տեխնոլոգիական ձեռնարկատիրության (STEP) «Գաղափարից դեպի շուկա» ծրագրի շրջանակներում, հինգշաբթի ասաց «Ձեռնարկությունների ինկուբատոր» հիմնադրամի (EIF) տնօրեն Բագրատ Ենգիբարյանը «Նորարարությունների խթանումը գիտական և տեխնոլոգիական ոլորտներում» վենչուրային համաժողովի ընթացքում։
«Այս տարի ներկայացվել էր 65 հայտ, որոնցից 15–ը հավանության են արժանացել փորձագիտական ժյուրիի կողմից և հնարավորություն են ստացել մասնակցել համաժողովին։ Հինգ հաղթողներ կստանան ֆինանսական աջակցություն` երեքը` 15 հազարական դոլար և երկուսը` 7,5 հազարական դոլար», – Ենգիբարյանը։
«Նորարարությունների խթանումը գիտական և տեխնոլոգիական ոլորտներում» վենչուրային համաժողովն անցկացվում է Երևանում Գիտական և տեխնոլոգիական ձեռնարկատիրության (STEP) ծրագրի շրջանակում։ Համաժողովի ընթացքում կներկայացվեն 15 ներդրումային ծրագրեր, որոնք մշակվել են հայ հետազոտողների և start-up ընկերությունների կողմից STEP–ի «Գաղափարից դեպի շուկա» դրամաշնորհային ծրագրի շրջանակում։
Նա նշեց, որ այս տարի նախագծերը վերաբերում են այնպիսի ուղղությունների, ինչպիսիք են` տեղեկատվական տեխնոլոգիաները, ճարտարապետությունը, գյուղատնտեսությունը, բիոտեխնոլոգիաները, ինչը վկայում է դրանց բազմազանության մասին։
«Այս տարի անցկացվող համաժողովի առանձնահատկությունը ծրագրի մասնակցության հայտերի թվի աճն է, ավելացել է նաև նախագծերի ուղղվածությունների քանակը։ Հետաքրքիր է նաև ժյուրիի կազմը, որի անդամները ոչ միայն կարող են փորձագիտական գնահատական տալ և դառնալ մենտոր, այլ նրանք նաև պոտենցիալ ներդրողներ են», – ասաց Ենգիբարյանը։
Որպես ծրագրի մասնակիցների համար ևս մեկ նորարարություն` Ենգիբարյանը նշեց նախագծերի ներկայացումից հետո ժյուրիի ամերիկացի անդամի անհատական խորհրդատվությունը ստանալու հնարավորությունը։
ՀՀ էկոնոմիկայի փոխնախարար Էմիլ Տարասյանն իր հերթին նշեց, որ նման միջոցառումների անցկացման կարևորությունը պայմանավորվում է նրանով, որ նմանատիպ միջոցառումները նպաստում են տեղեկատվական և բարձր տեխնոլոգիաների ենթակառուցվածքի ստեղծմանը։
«Այն նախագծերի հեղինակները, որոնք հաղթող չեն ճանաչվի, պետք է իմանան, որ նրանց գաղափարները չեն կորչի, քանի որ Էկոնոմիկայի նախարարությունը նորարարական ներդրումային նախագծերի տվյալների բազայի ստեղծման ծրագիր է սկսում։ Հետագայում պոտենցիալ ներդրողների հետ կայանալիք քննարկման ժամանակ դրանք անպայման կներկայացվեն», –ասաց Տարասյանը։
Նրա խոսքերով` ՀՀ կառավարությունը կարևորում է տեղեկատվական տեխնոլոգիաների ոլորտի զարգացումը և այդ ոլորտին աջակցություն է ցուցաբերվում, այդ թվում նաև օրենսդրական մակարդակով։
Վենչուրային համաժողովի կազմակերպիչներն են ՀՀ էկոնոմիկայի նախարարությունը, ԱՄՆ քաղաքացիական հետազոտությունների զարգացման հիմնադրամը և «Ձեռնարկությունների ինկուբատոր» հիմնադրամը։
STEP ծրագիրն իրագործվում է 2006 թվականից «Ձեռնարկությունների ինկուբատոր» հիմնադրամի կողմից՝ ԱՄՆ-ի քաղաքացիական հետազոտությունների և զարգացման հիմնադրամի (CRDF Global) ու Հայաստանի էկոնոմիկայի նախարարության հետ համատեղ` ներդրողների համար հետաքրքրություն ներկայացնող արդյունավետ գաղափարների, թիմերի և նախագծերի բացահայտման նպատակով։
Ծրագրի նպատակն է օժանդակել հայ մասնագետներին նորարարական արտադրանքի շուկայում ներկայանալու, նոր ձեռնարկություններ ստեղծելու, գործող ընկերությունների հետ արդյունավետ համագործակցելու հարցերում: Ծրագրի շրջանակում տրվում են դրամաշնորհներ, անցկացվում են կլաստերային սեմինարներ, բիզնես-դասընթացներ, տրամադրվում են իրավաբանական և հաշվապահական խորհրդատվություններ: –0–
Ծանոթացեք լուրերին առաջինն ու քննարկեք դրանք մեր Telegram-ում
12:30 04.12.2014