DigiTec 2014 բիզնես ֆորումը կանցկացվի Երևանում հունիսի 20-21–ը

ԵՐԵՎԱՆ, 6 մայիսի. /ԱՌԿԱ/.  DigiTec 2014 յոթերորդ ամենամյա բիզնես ֆորումը կանցկացվի Երևանում հունիսի 20-21–ը, հայտնեցին Ինֆորմացիոն տեխնոլոգիաների ձեռնարկությունների միությունից (UITE)։

Այդ տարի միջոցառումը կանցնի «Խելացի լուծումներ խելացի բիզնեսի համար» կարգախոսով։

ԴիջիԹեք Բիզնես Ֆորումի նպատակն է աջակցել բիզնես ոլորտին` գտնելու լավագույն լուծումները, ինչպես նաև տեխնոլոգիական ընկերություններին՝ հանդիպելու և ներկայանալու պոտենցիալ հաճախորդներին մեկ տեղում։

Այս տարի միջոցառումը կանցկացվի մի շարք թեմաների շուրջ, որոնց թվում են` սպասարկում և առևտուր, գյուղատնտեսություն և վերամշակում, շինարարություն և լեռնահանքային արդյունաբերություն, ֆինանսաբանկային ոլորտ և էլեկտրոնային առևտուր, առողջապահություն, կրթություն, տրանսպորտ։

Ակնկալվում է, որ ֆորումին կմասնակցեն մոտ 70 ընկերություններ և ավելի քան 2 հազար այցելու։

Ֆորումի կազմակերպիչներն են` Ինֆորմացիոն տեխնոլոգիաների ձեռնարկությունների միությունը (UITE) և «ԱրմենՏել» հեռահաղորդակցական ընկերությունը։ Բիզնես ֆորումն անցկացվում է Հայաստանի կառավարության հովանու ներքո։ Այս տարի բիզնես ֆորումին որպես հովանավոր միացել է նաև «ARinteg» ռուսական ընկերությունը։

DigiTec –2014 բիզնես ֆորումի տեղեկատվական հովանավորն է «ԱՌԿԱ» լրատվական գործակալությունը։

Ինֆորմացիոն տեխնոլոգիաների ձեռնարկությունների միությունը (UITE) հիմնվել է 2000 թվականին տվյալ բնագավառի ընկերությունների տնտեսական շահերը պաշտպանելու, բիզնեսի զարգացումը խթանելու, ՏՏ ոլորտի հետազոտությունները խրախուսելու համար։
-0-

Ծանոթացեք լուրերին առաջինն ու քննարկեք դրանք մեր Telegram-ում

16:43 06.05.2014