Հայաստանի ՏՏ ոլորտի վեց թիմեր դրամաշնորհներ կստանան «Ձեռնարկությունների ինկուբատոր» հիմնադրամից
ԵՐԵՎԱՆ, 16 փետրվարի. /ԱՌԿԱ/. Հայկական վեց թիմեր դարձել են ՏՏ ոլորտի կողմից համաֆինանսավորվող մրցույթի հաղթողներ, հայտնում է «Ձեռնարկությունների ինկուբատոր» հիմնադրամի մամուլի ծառայությունը։
Հաղորդման մեջ նշվում է, որ թիմերն այդպիսով հնարավորություն են ստացել կյանքի կոչել իրենց նորարարական և տեխնոլոգիական նախագծերը։
Փետրվարի 13-14–ին Երևանում անցկացվել է «Ձեռնարկությունների ինկուբատոր» հիմնադրամի կազմակերպած դրամաշնորհների համաֆինանսավորվող մրցույթի եզրափակիչ փուլը։
Գյումրիի հաղթողներ են դարձել «LoginEye» և «Գյումրիում անիմացիոն ընկերության հիմնում» նախագծերի հեղինակները, Վանաձորում` «Էլեկտրոնային սրբագրիչի նախագծում և արտադրումը» և «Հակակոռոզիոն ավտոմատ կայանը»։ Գլոբալ նախագծերի շրջանում «SkyCryptor» (ամպային տվյալների պաշտպանություն) «SoloLearn» (խաղերի տեսքով կրթական հարթակ)։
«Այս տարի առաջին անգամ համաֆինանսավորվող դրամաշնորհների մրցույթն անցկացվել է Գյումրիում և Վանաձորում, ինչը մեզ համար նոր մշակույթի, բիզնեսի զարգացման խթանման, մարզերում աշխատատեղերի ստեղծման հետաքրքիր փորձ է դարձել։ Եթե ծրագիրը հաջողություն ունենա, նույն մոդելը կկիրառվի նաև հետագա տարիներին հանրապետության մարզերում` երիտասարդությանը և ներդրողներին ցույց տալով մեր երկրի հնարավորությունները»,– նշեց «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը։
Մրցույթի հաղթողները կստանան 10-50 հազար դոլարի դրամաշնորհ։ Գլոբալ նախագծերը կհամաֆինանսավորվեն կազմակերպիչների տարբեր բաժնեմասերով և հենց ընկերությունների կողմից։ Գյումրիում կամ Վանաձորում իրականացվող նախագծերը 85 տոկոսով կֆինանսավորեն կազմակերպիչները, իսկ 15 տոկոսով` իրենք ընկերությունները։
Ներկայում անցկացվում է համաֆինանսավորվող մրցույթի հաջորդ փուլը, որի մասնակցության հայտերն ընդունվում են մինչև մարտի 2–ը։
Ծրագիրն իրականացնում են «Ձեռնարկությունների ինկուբատոր» հիմնադրամը, Հայաստանի էկոնոմիկայի նախարարությունը և Համաշխարհային բանկը։ -0-
Ծանոթացեք լուրերին առաջինն ու քննարկեք դրանք մեր Telegram-ում
19:40 16.02.2015