Հայ ծրագրավորողների մշակած PicsArt հավելվածը ներբեռնել է ավելի քան 400 մլն օգտատեր
ԵՐԵՎԱՆ, 27 մարտի. /ԱՌԿԱ/. PicsArt լուսանկարների խմբագրման հայկական հավելվածը ներբեռնել է ավելի քան 400 մլն օգտատեր, ասվում է ընկերության կայքում։
Ընկերության տվյալներով, հավելվածից ամսական օգտվում է ավելի քան 90 մլն ակտիվ օգտատեր։
Հայ ծրագրավորողների մշակած PicsArt-ը միակ անվճար հավելվածն է, որն իրական ստեղծագործական ազատություն է ընձեռում՝ խմբագրման համար նախատեսված ավելի քան 3000 գործիքներով ու հատուկ արհեստական ինտելեկտով զինված էֆեկտներով: Այն հասանելի է ողջ աշխարհում՝ 20 լեզվով: Հավելվածն ունի արդեն 400 միլիոն ներբեռնում և ամսական 90 միլիոն ակտիվ օգտատեր: Անվճար է iOS, Android և Windows հարթակների համար:
Ընկերության համահիմնադիր Արտավազդ Մեհրաբյանի և գլխավոր մենեջեր Միքայել Վարդանյանի խոսքով, վերջին երկու տարիների ընթացքում ընկերության աշխատողների թիվն ավելացել է 2.5 անգամ։ Ներկայում Հայաստանում PicsArt–ի գրասենյակն ունի ավելի քան 350 աշխատակից, որոնցից շատերը տեղեկատվական տեխնոլոգիաների, ծրագրերի կառավարման և դիզայնի մասնագետներ են։ Աշխատողների միջին տարիքը 25 տարեկանն է։ PicsArt–ն ավելի քան 30 աշխատակից էլ ունի Սան Ֆրանցիսկոյի գրասենյակում։
PicsArt լուսանկարների խմբագրման հայկական սթարթափի հավելվածը և սոցիալական ցանցը ստեղծվել է Android ՕՀ–ով աշխատող սարքերի օգտատերերի համար 2011 թվականի նոյեմբերին, 2013 թվականին հավելվածը հասանելի է դարձել iOS–ի համար, 2014 թվականին` Windows–ի։ Ամենից շատ օգտատերերը Եվրոպայից և Ամերիկայից են, թափ է հավաքում նաև Ասիան, ինչպես նաև մյուս երկրները։
Forbes–ը հայկական սթարթափի ընդհանուր արժեքը գնահատել է $250 մլն։ PicsArt–ը համարվում է աշխարհում ամենահայտնի անվճար հավելվածի` Instagram–ի արժանի մրցակիցը։ -0-
Ծանոթացեք լուրերին առաջինն ու քննարկեք դրանք մեր Telegram-ում
16:58 27.03.2017