Հայաստանի ՏՏ ոլորտի ընկերությունները կարող են պետական օժանդակություն ստանալ

ԵՐԵՎԱՆ, 2 դեկտեմբերի. /ԱՌԿԱ/. Հայաստանի խորհրդարանը երեքշաբթի նիստում առաջին ընթերցմամբ 119 «կողմ» և երկու ձեռնպահ ձայներով ընդունեց «Տեղեկատվական տեխնոլոգիաների ոլորտում պետական օժանդակության մասին» օրինագիծը և «Շահութահարկի մասին» և «Եկամտահարկի մասին» օրենքներում համապատասխան լրացումները։

Օրինագծի համաձայն, Հայաստանում պետք է ՏՏ ոլորտի պետական աջակցության նոր համակարգ ստեղծվի։
          
Ինչպես ավելի վաղ հայտնել էր Հայաստանի էկոնոմիայի նախարարի առաջին տեղակալ Գարեգին Մելքոնյանը, օրենսդրական փաթեթով առաջարկվում է բարենպաստ պայմաններ ստեղծել ոլորտի սկսնակ (start-up) ընկերությունների համար հարկային տեսանկյունից։

Նա նշել էր, որ մինչ օրս բնագավառի ընկերությունների համար չեն եղել օրենսդրական արտոնություններ, ինչի կապակցությամբ օրինագծով նախատեսվում է ավելի թեթև, պարզեցված և բարենպաստ պայմանների ստեղծում start-up–երի համար։

Մասնավորապես, նախատեսվում է ընկերության ստեղծման պարզեցված ընթացակարգ կիրառել, որը երեք տարի ժամկետով շահույթի զրո տոկոս տոկոսադրույքով և եկամտահարկի 10–տոկոսանոց տոկոսադրույքով աշխատանքի հնարավորություն կունենա։

Օրինագծի շահառուներ կարող են դառնալ տեղեկատվական տեխնոլոգիաների ոլորտի սկսնակ ընկերություններ կամ արդեն գործող ընկերություններ, բայց մինչ օրս չգրանցված մշակողների խմբեր, որոնք ՏՏ առաջխաղացման գաղափարներ ունեն և բաղկացած են ավելի քան 15 աշխատակիցներից։

2000 թվականին Հայաստանի կառավարությունը ՏՏ ոլորտը հայտարարել է երկրի տնտեսության գերակա ոլորտ։ 2014 թվականի հունվարի 1–ի տվյալներով, Հայաստանում գրանցված են ՏՏ ոլորտի ավելի քան 380 ընկերություններ, որոնցից 159–ը` արտասահմանյան կապիտալով կամ արտասահմանյան խոշոր ընկերությունների ներկայացուցչություններ։  

Ամեն տարի Հայաստանի տեղեկատվական տեխնոլոգիաների ոլորտն ապահովում է շուրջ 20-25–տոկոսանոց աճ։ ՏՏ ոլորտի բաժնեմասը Հայաստանի ՀՆԱ–ում կազմում է 380 մլն դոլար։ Բնագավառի զարգացման ռազմավարության համաձայն, 2018 թվականին ծրագրվում է ապահովել ՏՏ–ոլորտի 1 մլրդ դոլարի շրջանառություն։ -0-

Ծանոթացեք լուրերին առաջինն ու քննարկեք դրանք մեր Telegram-ում

20:34 02.12.2014