«Ոզնի 2015» մրցույթի մասնակիցները մրցանակներ են ստացել «Ռոստելեկոմից»
ԵՐԵՎԱՆ, 8 հունիսի. /ԱՌԿԱ/. «Ոզնի 2015» դպրոցական համակարգչային մրցույթի 40 մասնակիցներ շաբաթ օրը մրցանակներ են ստացել «Ռոստելեկոմ» ընկերությունից։
«Ոզնի 2015» համակարգչային մրցույթն անցկացվել է մայիսի 15–ին և 16–ին Տեղեկատվական–հեռահաղորդակցական տեխնոլոգիաների գերազանցության հայ–հնդկական կենտրոնում։
Մրցույթի նպատակն է բացահայտել դպրոցականների համակարգչային հմտություններն ու կարողությունները, հնարավորություն տալ համակարգչային ծրագրերի միջոցով դրսևորել ստեղծագործական ունակությունները, ստուգել սեփական հնարավորությունները։
«Մրցույթին մասնակցելն անվճար է։ Մրցույթին մասնակցում են 6–9 դասարանների դպրոցականներ։ Արդեն երրորդ տարի մրցույթը կրում է համահանրապետական բնույթ», – «ԱՌԿԱ» գործակալությանն ասաց միջոցառման կազմակերպիչ Մարիաննա Թովմասյանը։
Նրա խոսքով` հանրապետության մարզերի դպրոցականները դրսևորում են ավելի մեծ ակտիվություն, քան երևանցիները։ Նրանք բոլորը մասնակցել են երկու փուլերից բաղկացած մրցույթին։ Առաջին փուլին մասնակցել է ավելի քան 220 դպրոցական, եզրափակիչ է դուրս եկել 328–ը (Երևանի 28 և մարզերի 53 դպրոցներից)։ 328–ից ընտրվել է 40 հաղթող։
«Այս տարի մրցույթի անցկացման հարցում մեզ աջակցել է ՀՀ էկոնոմիկայի նախարարությունը», – ավելացրեց Թովմասյանը։
«ՋԻԷՆՍԻ–ԱԼՖԱ» ՓԲԸ–ի («Ռոստելեկոմի» խումբ) գլխավոր տնօրեն Հայկ Ֆարամազյանն իր հերթին նշեց, որ նման մրցույթների անցկացումը բարձրացնում է երեխաների համակարգչային գրագիտության և դպրոցականների կողմից նոր տեխնոլոգիաների նպատակային օգտագործման մակարդակը։
«Վստահ եմ, որ համակարգչային ծրագրերի օգտագործման միջոցով երեխաներն ավելի շատ կհարմարվեն ժամանակակից պայմաններին, ինչպես նաև այդ ամենը հնարավորություն կտա ապագայում հաջողությամբ շարունակել ուսումը բուհերում և դառնալ մրցունակ մասնագետներ», – ավելացրեց Ֆարամազյանը։
Միջոցառումն անցկացվում է «Ձեռնարկությունների ինկուբատոր» հիմնադրամի աջակցությամբ` Տեղեկատվական–հաղորդակցական տեխնոլոգիաների գերազանցության հայ–հնդկական կենտրոնի աջակցությամբ, ինֆորմացիոն հովանավորն է Կրթական տեխնոլոգիաների ազգային կենտրոնը։ –0–
Ծանոթացեք լուրերին առաջինն ու քննարկեք դրանք մեր Telegram-ում
13:35 08.06.2015