Երկիր մոլորակի յուրաքանչյուր բնակչին 2014 թվականի ավարտին գրեթե երկու ինտերնետ–սարք բաժին կընկնի

ԵՐԵՎԱՆ, 16 հոկտեմբերի. /ԱՌԿԱ/. 2014 թվականին աշխարհում կօգտագործվի համացանցին միացված գրեթե 12 միլիարդ սարք կամ 1.7 սարք` յուրաքանչյուր բնակչի հաշվով։ Այդ մասին, ինչպես գրում է Lenta.ru–ն, ասվում է Strategy Analytics վերլուծական ընկերության հետազոտությունում։

Մինչև 2020 թվականն ինտերնետ–սարքերի թիվը կաճի մինչև 33 միլիարդ` յուրաքանչյուր մարդուն բաժին կընկնի մինչև 4.3 սարք։

Հետազոտությունում հաշվի են առել բոլոր սարքերը, որոնք կարող են միանալ համացանցին` սմարթֆոններ, անհատական համակարգիչներ, պլանշետներ, «խելացի» տներ, smart-TV–ներ, ցանցին միացված մեդիասարքեր (խաղային հավելվածներ, մեդիանվագարկիչներ) և ձեռքին ամրացվող էլեկտրոնիկա («խելացի» ժամացույց, ֆիտնես ցուցիչներ)։

Ավանդական սարքերը, ինչպես ԱՀ–ն, սմարթֆոնները և պլանշետները, այժմ կազմում են համացանցին միացված և օգտագործվող սարքերի գրեթե մեկ երրորդը։ Այդ թվում, անձնական համակարգիչները կազմում են բոլոր ինտերնետ–սարքերի միայն 10 տոկոսը, մինչդեռ 2007 թվականին դրանք զբաղեցնում էին այդ շուկայի երկու երրորդը, ասվում է հետազոտությունում։

Սարքերի թվի բուռն աճը վերլուծաբանները նշել են ինտերնետ–իրերի հետևյալ կատեգորիաներում` միջմեքենայական փոխազդեցության սարքավորումներ (M2M), «խելացի» իրեր (օրինակ, «խելացի» ժամացույց), էլեկտրամատակարարման «խելացի» ցանցեր (smart grid) և «խելացի» քաղաքներ։ Արդեն այժմ դրանք կազմում են աշխարհում ինտերնետ–սարքերի գրեթե կեսը։ Մինչև 2020 թվականն այդ ուղղությունները թույլ կտան ինտերնետին միացնել ևս 17.6 մլրդ սարքեր։

«Համացանցին արդեն միացվել է 5 միլիարդ սարք, մենք այժմ միայն այդ հեղափոխության սկզբում ենք,– ասում է Strategy Analytics զեկույցի տնօրեն Էնդրյու Բրաունը։ – «Խելացի» քաղաքներն ու էլեկտրամատակարարման «խելացի» ցանցերը երկու ուղղություններ են, որոնք առաջիկա տարիներին կլինեն յուրաքանչյուր մարդու կյանքում»։ -0-

Ծանոթացեք լուրերին առաջինն ու քննարկեք դրանք մեր Telegram-ում

15:48 16.10.2014