Հայ խորհրդարանականները 2011 թ.-ի առաջին եռամսյակում նոր համակարգիչներ կստանան
ԵՐԵՎԱՆ, 19 հոկտեմբերի. /ԱՌԿԱ/. Հայ խորհրդարանականները հաջորդ տարվա առաջին եռամսյակում նոր համակարգիչներ կստանան, տեղեկացրեց ՀՀ ԱԺ աշխատակազմի ղեկավար Գեղամ Ղարիբջանյանը երեքշաբթի ՀՀ ԱԺ պետաիրավական և ֆինանսավարկային ու բյուջետային հարցերի մշտական հանձնաժողովներում 2011թ.-ի պետբյուջեի նախագծի քննարկման ժամանակ:
«Մենք կատարում ենք և հաջորդ տարի շարունակելու ենք զգալի փոփոխություններ կատարել խորհրդարանի աշխատանքում, այդ թվում նաև՝ վարչարարության հարցում: Խորհրդարանը համագործակցում է միջազգայի կառույցների, մասնավորապես՝ ԵԱՀԿ-ի և USAID-ի երևանյան գրասենյակների հետ: Մեզ աջակցություն են ցուցաբերում օտարերկրյա ծրագրերը, և մենք 2011 թ.-ի առաջին եռամսյակում հնարավորություն կունենանք թարմացնել բոլոր պատգամավորների համակարգիչները», - տեղեկացրեց նա:
Ղարիբջանյանի խոսքերով՝ միջազգային կառույցների հետ համատեղ իրականացվում են օտար լեզուների ուսուցման, վարչարարության մակարդակի բարձրացման ծրագրեր: Այսպես, ինչպես նշեց աշխատակազմի ղեկավարը, վերջին տարիներին ակտիվացել է խորհրդարանական դիվանագիտությունը, հայկական պատվիրակություններն ակտիվորեն աշխատում են տարբեր միջազգային խորհրդարանական կառույցներում: Ղարիբջանյանն ավելացրեց, որ նախորդ տարիների համեմատ՝ 2011 թ.-ին 106 միլիոն դրամով ավելացել են խորհրդարանի աշխատակազմի՝ օտարերկրյա այցելությունների համար նախատեսված ծախսերը և 15 միլիոն դրամով՝ ներկայացուցչական ծախսերը:
ՀՀ ԱԺ աշխատակազմի ղեկավարը տեղեկացրեց, որ հաջորդ տարի ծրագրվում է նաև վերանորոգել Ազգային ժողովի շենքը, որը կառուցվել է դեռևս 1954 թ.-ին և կապիտալ վերանորոգվել է 1980 թ.-ին:
«Մենք վերջերս դիմել ենք Հայաստանի կառավարությանը և մեր ավտոպարկից աճուրդի ենք ներկայացրել 12 հնացած ավտոմեքենաներ: Կառավարությունը մեզ ընդառաջ գնաց, և շուտով մենք կունենանք երկու ժամանակակից միկրոավտոբուսներ՝ հյուրերին սպասարկելու համար», - տեղեկացրեց Ղարիբջանյանը:
Հայաստանի 2011 թ.-ի պետբյուջեի նախագծի համաձայն՝ Հայաստանի խորհրդարանի աշխատակազմի ծախսերը նախատեսված են 137,8 միլիոն դրամի չափով:
Հայաստանի 2011 թ.-ի պետբյուջեի նախագծի համաձայն՝ պետական կառավարման՝ օրենսդիր, գործադիր և դատական իշխանությունների աշխատակազմերի ծախսերը կկազմեն 55,5 միլիարդ դրամ, ինչը 3,2 միլիարդ դրամով գերազանցում է 2010 թ.-ի պետբյուջեով նախատեսված ցուցանիշը:
ՀՀ կառավարությունը սեպտեմբերի 30-ին արտագնա նիստի ժամանակ հաստատել է հանրապետության 2011 թ.-ի պետական բյուջեի նախագիծը: Ըստ փաստաթղթի՝ պետբյուջեի ծախսերը նախատեսված են 998,6 միլիարդ դրամի սահմանում, եկամուտները՝ շուրջ 850 միլիարդ դրամի սահմանում՝ 148,6 միլիարդ դրամ դեֆիցիտի դեպքում: 2011 թ.-ին ՀՆԱ-ի աճը նախատեսված է 4,6 տոկոսի սահմանում:-0-
Ծանոթացեք լուրերին առաջինն ու քննարկեք դրանք մեր Telegram-ում
21:04 19.10.2010