Երկու էկրան ունեցող ռուսական սմարթֆոնը դեկտեմբերին կլինի միջազգային շուկայում

ԵՐԵՎԱՆ, 15 նոյեմբերի. /ԱՌԿԱ/. YotaPhone սմարթֆոնը նախատեսվում է միջազգային շուկա հանել դեկտեմբերին` մինչև Ամանորի տոների սկիզբը (ԱՄՆ–ում և մյուս երկրներում Սուրբ Ծնունդը նշվում է դեկտեմբերի 25–ին)։ Այս մասին հաղորդում է TechCrunch–ը` հղում անելով սարքի մշակող Yota Devices ընկերությանը։

Սեպտեմբերի սկզբին ոչ պաշտոնական աղբյուրներից հայտնի դարձավ, որ Ռուսաստանում ընկերությունը նախատեսում է YotaPhone–ի վաճառքները սկսել 2013 թ.–ի նոյեմբերին։ Նախորդ շաբաթ հայտնի դարձավ, որ «Սվյազնոյ» խանութների ցանցը համաձայնել է վաճառել սմարթֆոնը։ Մյուս ցանցերի, այդ թվում նաև «Евросеть»–ի հետ բանակցությունները շարունակվում են։ Սմարթֆոնը կարժենա մոտ 20 հազար ռուբլի, հաղորդում է  cnews.ru–ն։

Yota Devices ռուսական ընկերությունը YotaPhone–ը ներկայացրել է անցած տարվա դեկտեմբերին, իսկ 2013 թ.–ի փետրվարին ներկայացրել է սարքը Mobile World Congress ցուցահանդեսին։ Սմարթֆոնի առանձնահատկությունն այն է, որ նա ունի երկու էկրան, որոնք տեղադրված են մոնոբլոկ կորպուսի երկու կողմում։ Առջևի էկրանը գունավոր է, սենսորային (1280 x 720), հետևի էկրանը մշակված է էլեկտրոնային թանաքի (e-paper) տեխնոլոգիայով և ունի 640 x 360 պիքսել թողունակություն։ Երկու էկրանների չափը 4,3 դյույմ է։

Հետևի էկրանը մշտապես միացված է։ Նրա վրա օգտատերը կարող է տեսնել տեղեկացումները, հաղորդագրությունների առաջին տողերն ու այլ տեղեկատվություն` ամեն անգամ չակտիվացնելով հիմնական էկրանը, ինչպես դա արվում է սովորական սմարթֆոնի դեպքում։ Միաժամանակ մարտկոցի վրա այս ամենը գրեթե չի ազդում, e-paper–ը էներգիա է օգտագործում միայն պատկերի փոփոխության ժամանակ։

YotaPhone–ի e-paper էկրանը նաև կարելի է օգտագործել օրացույցի իրադարձությունների, եղանակի, հիշեցումների և այլ տեղեկատվություն մշտապես պատկերելու համար։ Այն կարելի է օգտագործել նաև հիմնական նշանակության համար` էլեկտրոնային գրքերի ընթերցանության նպատակով։ Բացի այդ, էկրանի վրա կարելի է կարևոր նշումներ անել, դրանք կմնան նույնիսկ երբ մարտկոցի լիցքավորումը վերջանա, հաղորդում է Yota Devices ընկերությունը։

YotaPhone–ն ունի 1 ՄՊ ճակատային տեսախցիկ և 13 ՄՊ հիմնական տեսախցիկ` ավտոֆոկուսով և լուսադիոդային փայլատակմամբ։ Պրոցեսորը երկմիջուկանի Qualcomm Krait–ի է` 1,7 ԳԳՑ  հաճախականությամբ, օպերատիվ հիշողությունը 2 ԳԲ է, ֆլեշ–հիշողությունը` 32 ԳԲ։ Կուտակիչի տարողությունը 1800 մԱչ է։ Սմարթֆոնի չափսերն են` 133,6 x 67 x 10 մմ, քաշը` 146 գրամ։ Սարքն ունի FM ռադիո, նրանով կարելի է որսալ LTE ռուսական հաճախականությունները։ –0–

Ծանոթացեք լուրերին առաջինն ու քննարկեք դրանք մեր Telegram-ում

15:28 15.11.2013