Apple-ը կրկին հնարավորություն է ստացել արգելել Samsung–ի սմարթֆոնները ԱՄՆ–ում

ԵՐԵՎԱՆ, 20 նոյեմբերի. /ԱՌԿԱ/. ԱՄՆ դաշնային վերաքննիչ դատանարը Apple–ին նոր հնարավորություն է տվել արգելել ԱՄՆ–ում Samsung–ի որոշ սմարթֆոնների մատակարարումը պատենտների խախտման պատճառով` չեղյալ ճանաչելով ստորին դատարանի վճիռը, հաղորդում է Փրայմը` հղում անելով Ռոյթեր գործակալությանը։

Գործի վերանայման որոշման պատճառն այն է, որ Apple–ի փաստարկները 2012 թ.–ին պատշաճ ուշադրության չեն արժանացել։ iPhone–ի և iPad–ի արտադրողը խնդրում էր դատարանին արգելել Samsung–ի 26 պլանշետների և սմարթֆոնների վաճառքը։ Apple–ում պնդում են, որ Samsung–ի այդ պլանշետների և սմարթֆոնների արտադրության ժամանակ օգտվել է նրա մշակումներից` նման կերպով զրկելով ընկերությանը շահույթի զգալի մասից։

Հարցն իր օգտին լուծելու համար Apple–ը պետք է ապացուցի, որ Samsung ընկերության կողմից ամերիկյան արտադրողի պատենտի օգտագործումը մրցակցային առավելություններ է հաղորդել իր սարքերին, որոնք ազդել են գնորդների ընտրության վրա։

Apple–ի և Samsung–ի միջև դատավարությունները տևում են արդեն մի քանի տարի, ընդ որում Apple–ը փորձում էր դատի տալ Samsung–ին միանգամից մի քանի երկրներում։ Էլեկտրոնիկայի արտադրողների միջև պատենտային պատերազմը ծավալվում է Android–ով աշխատող հեռախոսների դիրքերի ամրապնդման ֆոնին, որոնք կազմում են Samsung–ի արտադրանքի մեծ մասը և iPad պլանշետների ու iPhone սմարթֆոնների հիմնական մրցակիցներն են։

2012 թ.–ին ատենակալների դատարանը վճռել էր, որ  Samsung–ը պարտավոր է Apple–ին վճարել 1 մլրդ դոլար պատենտների խախտման համար։ Սակայն ավելի ուշ դատարանը որոշել էր, որ հաշվարկի ժամանակ 400 մլն ռուբլու սխալ է կատարվել։ Այժմ դատարանը կրկին քննարկում է փոխհատուցման հարցը։–0–

Ծանոթացեք լուրերին առաջինն ու քննարկեք դրանք մեր Telegram-ում

14:57 20.11.2013