Չինաստանում մեկնարկել է iPhone 6–ի պաշտոնական վաճառքը

ԵՐԵՎԱՆ, 17 հոկտեմբերի. /ԱՌԿԱ/. Ուրբաթ Չինաստանում մեկնարկել է Apple ընկերության թողարկած վերջին iPhone 6 և iPhone 6 Plus մոդելների պաշտոնական վաճառքը, հայտնում է ՌԻԱ Նովոստին։

Պեկինի կենտրոնում Apple–ի մասնագիտացված խոշոր խանութներից մեկում վաճառքի առաջին օրն առայժմ անցնում է առանց միջադեպերի։ Դրանում կարողացել է համոզվել ՌԻԱ Նովոստիի թղթակիցը։

Չինաստանի մայրաքաղաքում Apple–ի խոշորագույն չորս խանութներից մեկն իր դռներն է բացել տեղական ժամանակով ժամը 8։00–ին։

Անվտանգության աշխատակիցների հսկողությամբ խանութ էին ներս թողնում միայն նրանց, ովքեր նախապես պատվիրել էին ինտերնետում։ Միաժամանակ նոր սմարթֆոնների երջանիկ տերերին խանութի աշխատակիցները դիմավորում էին բուռն ծափահարություններով։ Երկու ժամ անց արդեն բոլոր ցանկացողները կարող էին մտնել խանութ։

Բայց մտնել խանութ և ուղղակի նոր սմարթֆոն ձեռք բերել առայժմ չի հաջողվում։

«iPhone 6 գնելու համար ձեզ անհրաժեշտ է նախնական պատվեր ձևակերպել համացանցում, այնուհետև միայն գալ ապրանքի հետևից»,– ՌԻԱ Նովոստիին է հայտնել խանութի աշխատակիցը։ Իսկ այն հարցին, թե երբ կարելի է անմիջապես ձեռք բերել սմարթֆոնը, նա դժվարացել է պատասխանել։

Չինաստանում iPhone 6 և iPhone 6 Plus սմարթֆոնների գները տատանվում են 5,288 յուանից (մոտ 34,5 հազար ռուբլի) մինչև 7,999 յուան (մոտ 53 հազար ռուբլի)։ ԶԼՄ–ների տվյալներով, հոկտեմբերի 10–ից Apple–ի չինացի երկրպագուներն ավելի քան 20 միլիոն առցանց պատվեր են կատարել։ -0-

Ծանոթացեք լուրերին առաջինն ու քննարկեք դրանք մեր Telegram-ում

14:37 17.10.2014