Լավագույն և վատագույն սմարթֆոնները

ԵՐԵՎԱՆ, 18 հունիսի. /ԱՌԿԱ/. PhoneArena–ն հրապարակել է 2015 և 2014թթ.–ի լավագույն և վատագույն սմարթֆոնների անունները` ելնելով երեք տարբեր թեստերի արդյունքներից (Primate Labs ընկերության Geekbench 3, Futuremark–ի PCMark թեստերն ու անցկացված սեփական թեստը), հաղորդում է  cnews.ru–ն։

Տարբեր թեստերի արդյունքում առաջատարների եռյակում ներառվել են Samsung Galaxy S6, Sony Xperia Z3, LG G4, Samsung Galaxy Note 4 և Google Nexus 6 սմարթֆոնները։ Միաժամանակ Sony Xperia Z3–ը ներառվել է բոլոր երեք թեստերի առաջին եռյակում, Samsung Galaxy S6–ն ու Galaxy Note 4–ը` երկու թեստերի արդյունքում և LG G4–ը ու Google Nexus 6–ը` մեկ թեստի արդյունքում։ Ավտոնոմ աշխատանքի ժամանակով լավագույն սմարթֆոններ են ճանաչվել Sony Xperia Z3–ը, Samsung Galaxy S6–ն ու Galaxy Note 4–ը։ Իսկ ավտոնոմ աշխատանքի ժամանակով ամենավատ սմարթֆոններն են LG G3–ը, Apple iPhone 6–ը և HTC One M9–ը։ Այս մոդելները, համապատասխանաբար, ամենաշատն են ներառվել վերջին եռյակում (LG G3–ը` երեք անգամ, Apple iPhone 6–ը` երկու անգամ և HTC One M9 –ը` ևս երկու անգամ)։

Geekbench 3 թեստի հաղթողներն են Samsung Galaxy S6–ը, Sony Xperia Z3–ն ու LG G4–ը։

PhoneArena–ի կարծիքով` PCMark թեստը լավագույնն է ներկայացնում սմարթֆոնների օգտագործման իրական պայմանները։ Այն ստեղծում է ամենօրյա շահագործման նման ծանրաբեռնվածություն, երբ օգտատերն օգտվում է մեսենջերից, վեբ–բրաուզերից, մշակում է լուսանկարներ և այլն։ PCMark–ն այս բոլոր գործողությունները ներկայացնում է էկրանի վրա, քանի որ օգտատերերը ևս դրանք տեսնում են էկրանին (ի տարբերություն Geekbench–ի, որտեղ ամեն ինչ տեղի է ունենում կադրի հետևում)։

PCMark թեստի արդյունքում հաղթել են Sony Xperia Z3–ը, Samsung Galaxy S6–ը և Samsung Galaxy Note 4–ը։

Փորձերի վերջում PhoneArena–ն անցկացրել է սեփական թեստը, որը համադրել է նկարագրված երկու մեթոդները`վերացական ալգորիթմն ու իրական ծանրաբեռնվածությունը։ Այս թեստի արդյունքում հաղթել են Sony Xperia Z3–ը, Samsung Galaxy Note 4–ն ու Google Nexus 6–ը։ -0-

Ծանոթացեք լուրերին առաջինն ու քննարկեք դրանք մեր Telegram-ում

11:54 18.06.2015