Mozilla-ն թողարկել է ամենաէժան սմարթֆոնը
ԵՐԵՎԱՆ, 26 օգոստոսի. /ԱՌԿԱ/. Mozilla–ն Intex Technologies հնդկական ընկերության հետ Հնդկաստանում թողարկել է ամենաէժան սմարթֆոնը` Firefox OS պլատֆորմով։ Այն արժե 1999 ռուփի (մոտ $33)։
Intex Cloud FX–ը զինված է 480 x 320 պիքսել թողունակության 3.5–դյույմանոց էկրանով, Spreadtrum չինական ընկերության մշակած 1 ԳՀց հաճախականությամբ SC6821 պրոցեսորով, 2 ՄՊ խցիկով և 1250 մԱժ տարողունակության մարտկոցով։
Սարքը նախատեցված է GSM 900/1800 ցանցի համար, ունի 265 ՄԲ ներկառուցված հիշողություն և կարող է միանալ համակարգչին USB մալուխի օգնությամբ։ Ունի Wi-Fi հնարավորություն, մինչև 4 ԳԲ տարողունակության հիշողության քարտեր և երկու SIM-քարտ։ GPS նախատեսված չէ։ Օգտագործողներին բեռնելու համար հասանելի կլինի մոտ հազար հավելված, հայտնում է cnews.ru–ն։
Mozilla–ի նախագահ Լի Գունը (Li Gong) հայտնել է, որ Intex Cloud FX–ը բացում է ուլտրաէժան սմարթֆոնների նոր կատեգորիա։ Հարկ է նշել, որ այս տարվա փետրվարին կայացած շնորհանդեսի ժամանակ Mozilla–ում նշում էին, որ սարքի արժեքը կկազմի 25 դոլար։ -0-
Ծանոթացեք լուրերին առաջինն ու քննարկեք դրանք մեր Telegram-ում
15:00 26.08.2014