Samsung-ը Tizen օպերացիոն համակարգով ևս մի քանի սմարթֆոն է պատրաստում
ԵՐԵՎԱՆ, 27 հունիսի. /ԱՌԿԱ/. Հունիսի սկզբին Samsung–ը ներկայացրել էր Samsung Z սմարթֆոնը, որը Tizen օպերացիոն համակարգով գործող առաջին բջջային սարքն էր: Ինչպես հաղորդում են ցանցային աղբյուրները, Samsung-ն այդ ծրագրային պլատֆորմով ևս մի քանի սմարթֆոն է պատրաստում, հաղորդում է 3dnews.ru-ն:
Նշվում է, որ ապագա սարքերը 17 տարբեր կոդեր կունենան: Դրանցից շատերի սերիական համարը սկսվում է «SM-Z910»-ով, ինչպես Samsung Z-ինն է: Այսպիսով, կարելի է ենթադրել, որ այդ սմարթֆոնները կլինի Samsung Z-ի մոդիֆիկացված տարբերակները: Հիշեցնենք, որ վերջինն ունի Super AMOLED 4,8 դյույմանոց սենսորային էկրան՝ 720х1280 պիքսել թողունակությամբ, 2,3 ԳԳց չորսմիջուկանի պրոցեսոր, 2 Գբ օպերատիվ հիշողություն, 16 Գբ տարողունակությամբ ներկառուցված ֆլեշ-մոդուլ, 2 և 8 մեգապիքսել տեսախցիկ:
Բացի այդ, թողարկման նախապատրաստվող Tizen սմարթֆոնների մեջ կան մոդելներ, որոնց սերիական համարները սկսվում են «SM-Z900», «SM-Z700» և «SM-Z500» կոդերով: Ցավոք, այս պահին այդ սմարթֆոնների բնութագրի վերաբերյալ տեղեկություն չկա, սակայն կարելի է ենթադրել, որ Tizen-սմարթֆոնների շարքում դրանք ավելի ցածր դիրք կունենան, քան առաջնեկը՝ Samsung Z-ը: Սմարթֆոններն ամենայն հավանականությամբ կներկայացվեն արդեն երրորդ եռամսյակում:
Նշենք, որ բացի սմարթֆոններից, Tizen օպերացիոն համակարգն այժմ օգտագործվում է Samsung NX300M տեսախցիկում, ինչպես նաև Samsung Gear 2 և Gear 2 Neo «խելացի» ժամացույցներում: Հետագայում այն կարող է կիրառվել նաև այլ սարքերում, օրինակ՝ հեռուստացույցներում:-0-
Ծանոթացեք լուրերին առաջինն ու քննարկեք դրանք մեր Telegram-ում
15:44 27.06.2014