Samsung–ը ներկայացրել է իր ամենաբարակ սմարթֆոնը
ԵՐԵՎԱՆ, 12 հունվարի. /ԱՌԿԱ/. Samsung Electronics ընկերությունը Մալայզիայում կայացած միջոցառման ժամանակ պաշտոնապես ներկայացրել է Galaxy A7 սմարթֆոնը, որի շուրջ ենթադրությունները երկար ժամանակ շրջանառվում էին համացանցում։ Նոր սմարթֆոնը կորեական հսկայի թողարկած ամենաբարակ սմարթֆոնն է, հաղորդում է Cnews–ը` հղում անելով SoyaCincau ռեսուրսին։
Samsung Galaxy A7–ի հաստությունը 6,3 մմ է, ինչը 0,4 մմ–ով քիչ է ավելի վաղ թողարկված Galaxy A5–ից և Galaxy Alpha–ից (6,7 մմ)։ Համեմատության համար հիշեցնենք, որ iPhone 6–ի հաստությունը 6,9 մմ է, իսկ Galaxy S5–ինը` 8,1 մմ։ Նշենք, որ Galaxy A7–ը բարակության ցուցանիշով բացարձակ ռեկորդակիր չէ։
Այդ կոչումը պատկանում է Vivo X5 Max չինական սարքին, որի կորպուսն ընդամենը 4,75 մմ է։ Galaxy A7–ն ունի Super AMOLED 5,5 դյույմանոց էկրան` 1920 x 1080 պիքսել թողունակությամբ։ Համեմատության համար նշենք, որ Galaxy A5–ն ունի 5 դյույմանոց էկրան, իսկ Galaxy S5–ի էկրանը 5,1 դյույմ է։
Դեռ հայտնի չէ, թե երբ Samsung Galaxy A7–ը կհայտնվի միջազգային շուկայում։ Մալայզիայում նախատեսվում է նորույթի վաճառքը սկսել փետրվարին։ Ընկերությունը չի նշում սմարթֆոնի արժեքը։ Միաժամանակ մետաղական սմարթֆոններն այդքան էլ չեն օգնել Samsung–ին պայքարել պահանջարկի նվազման դեմ։ Ընկերությունը պատրաստվում է 2014 թ–ի IV եռամսյակի արդյունքում զեկուցել շահույթի 37 տոկոսանոց անկման մասին և նշել վերջին երեք տարում գրանցված տարեկան շահույթի առաջին նվազման մասին։–0–
Ծանոթացեք լուրերին առաջինն ու քննարկեք դրանք մեր Telegram-ում
14:23 12.01.2015