Samsung–ը հայտարարել է, որ թողարկել է սեփական պլատֆորմով առաջին սմարթֆոնը
ԵՐԵՎԱՆ, 3 հունիսի. /ԱՌԿԱ/. Samsung–ը հայտարարել է, որ արդեն թողարկել է սեփական Tizen օպերացիոն համակարգով Samsung Z առաջին սմարթֆոնը։ Այն կներկայացվի հունիսի 3–ին Սան Ֆրանցիսկոյում Tizen Developer Conference-2014 մշակողների համաժողովում։ Ռուսաստանում Samsung Z–ը կսկսեն վաճառել երրորդ եռամսյակում։ Սարքի գինը չի նշվում, տեղեկացնում է РБК–ն։
HD Super AMOLED 4.8–դյույմանոց էկրանով սմարթֆոնը զինված է 2.3 ԳՀց տակտային հաճախականության չորսմիջուկանի պրոցեսորով։ Ընկերությունը չի ճշտում, թե կոնկրետ ինչ պրոցեսոր է օգտագործում այդ սմարթֆոնը։ Ինչպես և Samsung Galaxy S5–ում, Samsung Z–ում ներկառուցված է մատնահետքերի ցուցիչ։ Սմարթֆոնի չափերն են` 138,2 х 69,8 х 8,5 մմ, քաշը`136 գրամ, մարտկոցի տարողությունը` 2600 մԱժ։ Հետին պանելին 8 ՄՊ թողունակության խցիկ է, դիմացի պանելի վրա` 2.1 ՄՊ խցիկ։ Սմարթֆոնն ունի LTE ցանցի աշխատանքի հնարավորություն։ Նորույթը հասանելի է սև և ոսկեգույն տարբերակներով։
Ընկերությունն արդեն ունի Tizen–ի հիմքով սարքեր` Samsung NX300 և Samsung NX2000 խցիկները, ինչպես նաև 2014 թվականի փետրվարին ներկայացված Gear 2 և Gear 2 Neo «խելացի» ժամացույցները։ Tizen–ի հիմքը Linuх միջուկն է, դրա առաջխաղացմամբ զբաղվում են Samsung–ը և Intel–ը։
IDC–ի տվյալներով, սմարթֆոնների շուկայում Android–ի մասնաբաժինը 2013 թվականին ավելացել է մինչև 78.1 տոկոս։ Երկրորդ տեղը` Apple–ի iOS–ինն է, որի մասնաբաժինը նվազել է մինչև 17.6 տոկոս։ Windows Phone–ի մասնաբաժինը կազմել է 3 տոկոս (աշխարհի բոլոր սմարթֆոններից), BlackBerry–ի մասնաբաժինը` ընդամենը 0.6 տոկոս։ Մյուս բոլոր ՕՀ–ները կառավարել են աշխարհում սմարթֆոնների միայն 0.7 տոկոսը։ -0-
Ծանոթացեք լուրերին առաջինն ու քննարկեք դրանք մեր Telegram-ում
12:30 03.06.2014