«ՆՈՒՌ» ծրագիրը մեծացնում է իր գործունեության աշխարհագրությունը Ղարաբաղում, համակարգիչներ են տրամադրվել 7100 դպրոցականների

ԵՐԵՎԱՆ, 24 հոկտեմբերի. /ԱՌԿԱ/. ՆՈՒՌ ծրագիրը մեծացնում է իր գործունեության աշխարհագրությունը, «ԱՌԿԱ» գործակալությանը տեղեկացրեցին «Ֆրութֆուլ Արմենիա» հիմնադրամից:

«ՆՈՒՌ» («Նոր ուսումնական ռազմավարություն») ծրագրի նպատակն է նոր կրթական սկզբունքների ներդրումը դպրոցական կրթության համակարգում: Ծրագրի իրականացման համաձայնագիրը ստորագրվել է 2011 թ.-ի հունվարին արգենտինահայ ձեռներեց Էդուարդո Էռնեկյանի և ԼՂՀ կառավարության միջև՝ ի դեմս վարչապետ Արա Հարությունյանի:

Հաղորդագրության համաձայն՝ եթե նախորդ տարիներին արգենտինահայ բարերար Էդուարդո Էռնեկյանի նվեր XO համակարգիչները բաշխվում էին Ստեփանակերտի, Շուշիի և Քարին տակի առաջինից չորրորդ դասարանի բոլոր աշակերտներին և ուսուցիչներին, ապա այս տարի արդեն ՆՈւՌ ծրագիրն ընդարձակել է աշխարհագրությունը և այժմ ընդգրկում է 6 նոր շրջաններ` Հադրութի, Բերձորի, Քարվաճառի, Մարտակերտի, Մարտունու և Ասկերանի:

«Դրանից բացի 2014 -2015 ուսումնական տարին ՆՈւՌ ծրագիրը նշում է նաև մեծ տեխնոլոգիական ցատկով. 1-4-րդ դասարանցիներին հանձնված XO տիպի դյուրակիր համակարգիչներից բացի, Ստեփանակերտի և Շուշիի 6-րդ դասարանցիներին են հանձնվում Class Mate տիպի համակարգիչներ», - նշվում է հաղորդագրության մեջ:

Class Mates տիպի համակարգիչները նախատեսված են պատանեկություն ոտք դնող աշակերտների համար: Class Mates-ը գործում է Windows 8 –ի հիման վրա, ինչ թույլ է տալիս կրթության մաքսիմալացում` ապահովելով տեքստերի մշակիչներով, աղյուսակների կազմման, աշխատանքների գեղարվեստական ներկայացման, տեսանյութերի ու խաղերի ստեղծման, ինչպես նաև համացանցում մեծ արագությամբ նավարկելու հնարավորություններ:

Նոր համակարգիչն ունի նաև ստեղծագործական ջիղը խթանող ու դրա զարգացմանը նպաստող հնարավորություններ` նկարելու և գունավորելու միջոցներ, համացանցային տեսախցիկ` ձայնագրիչով, որոնք թույլ են տալիս երեխաներին արտահայտվել և շփվել տեսողական դաշտում, թույլ է տալիս լուսանկարել ու տեսագրել, հետագայում այդ նյութերը խմբագրել: Բացի այդ, տալիս է ընթերցանության միջոցներ, որոնք կօգնեն աշակերտներին սովորել ու բարելավել իրենց կարողությունները:

Արդեն ԼՂՀ-ում և ՀՀ-ում 7100 երեխա ստացել է նոր համակարգիչ, որից 750-ը Class Mate տիպի, որոնք բաժանվել են Ստեփանակերտի և Շուշիի 6-րդ դասարանցիներին:

Նախքան համակարգիչների հանձնումն իրականացնելը անցկացվել են դպրոցների ուսուցիչների վերապատրաստման դասընթացներ:

«ՆՈՒՌ» ծրագիրն իրականացվում է Հայկական բարեգործական ընդհանուր միության (AGBU) հետ համատեղ ԼՂՀ ԿԳՆ-ի աջակցությամբ:

«Ֆրութֆուլ Արմենիա» ոչ առևտրային անկախ նախագիծը հիմնադրվել է 2005 թ.-ին: Նախագծի նպատակն է ապահովել ֆերմերական տնտեսությունների զարգացումը գյուղական համայնքների զարգացման խրախուսման և գյուղատնտեսության կայուն զարգացման հեռանկարների ընդլայնման միջոցով:-0-

Ծանոթացեք լուրերին առաջինն ու քննարկեք դրանք մեր Telegram-ում

19:39 24.10.2014