«ԱրմենՏել» ընկերությունը «Հայաստանի մանուկներ» հիմնադրամի հետ համատեղ 2012 թ.-ին վեց գյուղական դպրոցներում համակարգչային գրագիտության դասընթացներ է կազմակերպում
ԵՐԵՎԱՆ, 31 հունվարի. /ԱՌԿԱ/. «ԱրմենՏել» ընկերությունը «Հայաստանի մանուկներ» հիմնադրամի հետ համատեղ 2012 թ.-ին վեց գյուղական դպրոցներում համակարգչային գրագիտության դասընթացներ է կազմակերպում, երեքշաբթի երկու կազմակերպությունների միջև համագործակցության հուշագրի ստորագրման արարողության ընթացքում տեղեկացրել է «ԱրմենՏելի» գլխավոր տնօրեն Իգոր Կլիմկոն:
Կլիմկոյի խոսքերով՝ չնայած երկրում աշխատանքն ու բիզնեսը հիմնականում կենտրոնացված են մեծ քաղաքներում և մայրաքաղաքում, հարկավոր է ուշադրություն դարձնել նաև Հայաստանի հեռավոր շրջանների և գյուղերի զարգացմանը:
«Մենք համագործակցություն ենք սկսում հիմնադրամի հետ, որը բավականին երկար ժամանակ աշխատում է Հայաստանի տարբեր մարզերում... Ծրագիրը թույլ կտա ավելի քան 100 ուսուցիչների ծանոթանալ համակարգչային տեխնոլոգիաների սկզբունքների և հիմունքների, ինտերնետում աշխատանքի սկզբունքների հետ», - հայտարարել է Կլիմկոն:
Նրա խոսքերով՝ հիմնական խնդիրն է, որպեսզի «ուսուցիչները ընկալեն տեղեկատվական ռեսուրսների օգտագործման սկզբունքները կրթական գործընթացում»:
«Հայաստանի մանուկներ» հիմնադրամը բարեգործական կազմակերպություն է, որի գործունեությունն ուղղված է Հայաստանի գյուղական համայնքներում բնակվող երեխաների համար լուսավոր ապագայի ձեռքբերմանն՝ ապահովելով որակյալ կրթություն, առողջապահություն, ակտիվ կյանք ու տնտեսապես բարենպաստ պայմաններ երեխաների և երիտասարդների համար:
Այժմ հիմնադրամն իրականացնում է «Հայաստանի գյուղական համայնքների զարգացում» ծրագիրը, որի շրջանակներում գործունեություն է իրականացնում Հայաստանի մի շարք համայնքներում:
«ԱրմենՏել» ՓԲԸ- ն «Վիմպելկոմ» ընկերության դուստր ձեռնարկությունն է (Beeline ապրանքանիշ): 2007 թվականի ապրիլից: «ԱրմենՏելի» 100 տոկոս բաժնետոմսերը պատկանում են ռուսական ընկերությանը, որը մատուցում է ձայնային կապի և տվյալների փոխանցման ծառայություններ անլար և ֆիքսված հեռախոսակապի տեխնոլոգիաների լայն շրջանակում, ինչպես նաև լայնաշերտ Ինտերնետ կապի ծառայություններ: -0-
Ծանոթացեք լուրերին առաջինն ու քննարկեք դրանք մեր Telegram-ում
16:40 31.01.2012