Երևանի բոլոր դպրոցներում միասնական էլեկտրոնային համակարգ կներդրվի
ԵՐԵՎԱՆ, 8 փետրվարի. /ԱՌԿԱ/. Երևանի բոլոր դպրոցներում մինչև 2012թ.-ի մարտը միասնական էլեկտրոնային կրթական համակարգ (dasaran.am) կներդրվի, ասաց ծրագրի համահիմնադիր Սուրեն Ալոյանը:
Երևանի քաղաքապետ Տարոն Մարգարյանը և <<Dasaran.am>> կրթական ծրագրի համահիմնադիր Սուրեն Ալոյանը ստորագրել են փոխըմբռնման հուշագիր, որը հնարավորություն է տալիս քաղաքապետարանի ենթակայության բոլոր դպրոցներում կիրառել ծրագիրն ու տեղեկատվական տեխնոլոգիաների ներդրման միջոցով նպաստել կրթության որակի բարձրացմանը: Ծրագիրը հնարավորություն է տալիս կայքում հետևելու դպրոցականների հաճախելիության և առաջադիմության ցուցանիշներին, ինչպես նաև տեղեկանալու դպրոցում կազմակերպվող ժողովների, միջոցառումների, որոշումների և հաշվետվությունների մասին, բացահայտել ու խրախուսել աշակերտներին ներդպրոցական, միջդպրոցական և համահայկական ինտելեկտուալ մրցույթների, խաղերի միջոցով:
«dasaran.am կրթական ծրագիրն այսօր նորագույն տեխնոլոգիաների ներդրման միջոցով դպրոցների գործունեությունն առավել թափանցիկ դարձնելու հնարավորություն է ընձեռում, այսինքն՝ բոլոր շահառուներին, լինի ծնող, դպրոցական, ուսուցիչ կամ տնօրեն, թվայնացման միջոցով երեխաների առաջադիմությունների մասին առավել հասանելի տեղեկատվություն ստանալու հնարավորություն է ընձեռում»,- ասաց Ալոյանը:
Նա նշեց, որ ներկայում ծրագիրը ներդրված է Երևանի 160 դպրոցներում, իսկ մարտից հետո ծրագրին նախատեսված է միացնել ՀՀ տարածքի բոլոր դպրոցները:
Ալոյանն ընդգծեց, որ ծրագրի հիմնական խնդիրն է ուսումնական գործընթացը հետևելու համար մեխանիզմների ստեղծումը, ծնողների, աշակերտների և ուսուցիչների միջև կապի համապատասխան համակարգի ձևավորումը:
Նա նշեց, որ ծրագրին կից նաև պորտալ է ստեղծվել, որը դպրոցականներին օլիմպիադաներին, մրցույթներին և ինտելեկտուալ ծրագրերին մասնակցելու հնարավորություն կընձեռի:
Երևանի քաղաքապետարանի աշխատակազմի հանրակրթության վարչության պետ Գայանե Սողոմոնյանն իր հերթին նշեց, որ ստորագրված հուշագրի համաձայն, Երևանի քաղաքապետարանը ոչ միայն ողջունում է ծրագրի ներդրումը, այլ նաև տարածքներ է հատկացնում դպրոցների ուսուցիչների և տնօրենների կողմից ծրագիրն օգտագործելու դասընթացների համար:
Նա ավելացրեց, որ ծրագիրն արդեն դրական արձագանքներ է ստացել ծնողների և ուսուցիչների կողմից:
2011 թվականի օգոստոսին երկու նմանատիպ հուշագիր է ստորագրվել՝ մեկը ՀՀ ԿԳՆ-ի և Dasaran.am ծրագրի, մյուսը՝ Dasaran.am-ի և VivaCell-MTS-ի միջև:
Նախագծի ֆինանսավորումն իրականացնում է VivaCell-MTS-ը՝ Ռուսաստանում և ԱՊՀ-ում խոշոր օպերատորի՝ «Մոբիլնիե տելեսիսիտմի» ընկերության դուստր ընկերությունը:--0-
Ծանոթացեք լուրերին առաջինն ու քննարկեք դրանք մեր Telegram-ում
17:57 08.02.2012