ՎիվաՍել–ՄՏՍ–ի բաժանորդները կկարողանան «ձայնային» SMS–ներ ուղարկել բջջային հեռախոսից ստացիոնար հեռախոսահամարին

ԵՐԵՎԱՆ, 15 ապրիլի. /ԱՌԿԱ/. «ՆԻԿԻՏԱ Մոբայլ» ինովացիոն ընկերությունը գործարկել է SMS2Voice ծառայությունը, որը VivaCell-ի բջջային ցանցի բաժանորդներին թույլ է տալիս SMS-հաղորդագրություններ ուղարկել բջջային հեռախոսից դեպի ստացիոնար հեռախոսահամար (ներառյալ ավտոպանասխանիչը), երկուշաբթի «ԱՌԿԱ» գործակալությանը հաղորդեցին ընկերության մամուլի ծառայությունից։

Հաղորդագրության համաձայն, բջջայինից ֆիքսված հեռախոսահամար տեքստային հաղորդագրության ուղարկումն իրականացվում է տեքստը ձայնային հաղորդագրություն վերածելու միջոցով: Համակարգն ինքն է զանգ կատարում հասցեատիրոջ հեռախոսահամարին, SMS-հաղորդագրության տեքստը ձևափոխվում է ձայնային ձևաչափ և ընթերցվում է ֆիքսված հեռախոսակապի բաժանորդին: Անհրաժեշտության դեպքում բաժանորդը կարող է կրկին ունկնդրել ստացած հաղորդագրությունը, հետևելով օպերատորի հրահանգներին, և/կամ ուղարկել ձայնային պատասխան:

Պատասխանը տեղ է հասցվում հեռախոսազանգի կամ SMS-ծանուցման միջոցով, և ստացողը կարող է պատասխանն ունկնդրել, հավաքելով ծանուցման մեջ նշված համարը:

Ֆիքսված համարին SMS-հաղորդագրություն ուղարկելու արժեքը կազմում է 100 դրամ, իսկ ծանուցման մեջ նշված համարին զանգահարելու արժեքը 90 դրամ է (ներառյալ ԱԱՀ-ն):

Նախորդ տարի «ՆԻԿԻՏԱ Մոբայլ» ընկերությունը Հայաստանում ներդրեց «խոսող» SMS-հաղորդագրություններ առաքելու ծառայությունը «ԱրմենԹելի» բջջային կապի բաժանորդների համար, համագործակցելով «Արմենթել» (ապրանքանիշը` Beeline) հեռահաղորդակցման օպերատորի հետ:

Ընկերությունը նշում է, որ ներկայումս բավական մեծ թվով բաժանորդներ ունեն, որոնք ակտիվորեն օգտվում են SMS2Voice ծառայությունից, ինչն, իր հերթին, վկայում է նման ծառայություն ներդնելու անհրաժեշտության մասին:

«Այժմ գործընկերության շրջանակներն ընդլայնվում են, և նոր ծառայություն մատուցելու գործընթացին միացավ նաև VivaCell-ը: Հետագայում նմանատիպ համագործակցություն է նախատեսվում ծավալել նաև Հայաստանում և ԼՂՀ-ում գործող այլ օպերատորների հետ»,– ասվում է հաղորդագրության մեջ։

Գրադարձությունը պահպանելու շնորհիվ, ձայնային հաղորդագրության տեսքով ուղարկելու ենթակա տեքստը հնարավոր է հավաքել կամ լատինատառ, կամ կիրիլիցայով, կամ էլ հայերեն` եթե օգտատիրոջ բջջային հեռախոսը նման օպցիա ունի: Համակարգը ֆիլտրում է հաղորդագրությունները և դուրս մաղում ոչ ցանկալիները, որոնք պարունակում են գովազդ կամ անպարկեշտ բառապաշար: Կրկնական առաքման ճկուն մեխանիզմի շնորհիվ, հասցեատիրոջ կողմից հաղորդագրության ստացումը երաշխավորվում է:

«SMS2Voice ծառայությունը առանձնանում է մի շարք գրավիչ հատկանիշներով։ Այն առավել հարմար է նրանց համար, ովքեր SMS-ներ օգտագործելուն չեն տիրապետում, ինչը, կարծում ենք, հատկապես կարևոր է տարիքով մարդկանց և թույլ տեսողությամբ տառապող մարդկանց համար: Ֆիքսված համարին SMS ուղարկելը չափազանց պարզ է ու ամենևին չի տարբերվում արդեն սովորական դարձած բջջային ցանցում նման ձևաչափով շփումներից: SMS-ի ստացումը առավելագույնս մատչելի է. հարկավոր է ընդամենը հեռախոսի լսափողը վերցնել և լսել հաղորդագրությունը»,– նշել է «ՆԻԿԻՏԱ Մոբայլ» ՍՊԸ-ի տվյալ ծրագրի մենեջեր Նաիրա Աղայանը։

Հայաստանում միայն «ՆԻԿԻՏԱ Մոբայլ» ՍՊԸ-ն է ձեռնամուխ լինում SMS2Voice ծառայության առաջխաղացմանը: Տեխնոլոգիական լուծման ճկունությունը թույլ է տալիս նվազագույնի հասցնել համակարգի ներդրման ժամանակը և օպերատորի ենթակառուցվածքում փոփոխություններ չի պահանջում:

«Նիկիտա Մոբայլ Արմենիա» ընկերությունը հիմնադրվել է 2007 թ.-ին, ներառված է Nikita Group ընկերությունների խմբի մեջ և Հայաստանում VAS-ծառայությունների առաջատար փրովայդերն է: Ընկերությունը կառավարման ամբողջական ծառայություններ է առաջարկում՝ կոնտենտի և VAS-ծառայությունների հետ կապված նախագծերի մշակման, ներդրման և տեխնիկական աջակցության համար: Լայն հնարավորություններ կան MMS, WAP, GPRS, SMS, J2ME, USSD, IVR, Bluеtооth, շարժական հեռուստատեսության, վիդեո-որոնման նախագծերի լայնամասշտաբ իրագործման համար:

Կառուցողական համագործակցություն է հաստատվել Հայաստանում գործող հեռահաղորդակցությունների և բջջային կապի բոլոր օպերատորների հետ (ArmenTel-Beeline, VivaCell-MTS և Orange Armenia):-0-

Ծանոթացեք լուրերին առաջինն ու քննարկեք դրանք մեր Telegram-ում

13:46 15.04.2013