VIVACELL-MTS-Ը 60,6 ՄԻԼԻՈՆ ԴՐԱՄ Է ՏՐԱՄԱԴՐԵԼ՝ ՀԱՅԱՍՏԱՆԻ ԱՄԵՐԻԿՅԱՆ ՀԱՄԱԼՍԱՐԱՆՈՒՄ ՏԵՍԱԿՈՆՖԵՐԱՆՍ-ՍՐԱՀԻ ՍՏԵՂԾՄԱՆ ՀԱՄԱՐ
ԵՐԵՎԱՆ, 12 մարտի. /ԱՌԿԱ/. Հայկական բջջային օպերատոր VivaCell-MTS-ը 60,6 միլիոն դրամ է տրամադրել՝ Հայաստանի Ամերիկյան համալսարանում տեսակոնֆերանս-սրահի ստեղծման համար։
Նախօրեին բացված տեսակոնֆերանս-սրահը համալրված է հեռահաղորդակցական ինտերակտիվ տեխնոլոգիաների համակարգով։ Դասախոսների հետ ուսանողների շփումն այժմ տեղի է ունենում իրական ժամանակի ռեժիմում։ Այս նորարարական տեխնոլոգիայի շնորհիվ ՀԱՀ-ի ուսանողական և դասախոսական կազմը տեսակոնֆերանսի միջոցով կարող է ունկնդրել մեկ այլ համալսարանից «հրավիրված» դասախոսի դասախոսությունը։
Ինչպես այս կապակցությամբ նշել է VivaCell-MTS ընկերության գլխավոր տնօրեն Ռալֆ Յիրիկյանը, ընկերության նպատակը Հայաստանն աշխարհին ու աշխարհը Հայաստանին մոտեցնելն էր։
«Մենք պատասխանատու ենք կոմպետենտ և մրցունակ կադրերի զարգացման, Հայաստանում հմուտ և ճկուն մարդկային կապիտալի զարգացման համար, և ամենաժամանակակից տեխնոլոգիաների կիրառումը կրթության ոլորտում այսօր անհրաժեշտություն է, եթե մենք ուզում ենք շուկայական գլոբալ մրցակցությանը դիմանալ», - ասել է Յիրիկյանը։
Նրա խոսքերով, տեսակոնֆերանսը հնարավորություն է տալիս հայաստանցի և արտասահմանցի հասակակիցներին միմյանց հետ հաղորդակցվել, հետազոտել, վերլուծել և կիսել տեղեկատվությունը։
ՀԱՀ-ի նախագահ Հարություն Արմենյանն իր հերթին նշել է, որ համալսարանի ողջ անձնակազմն ու ուսանողությունը գնահատում են ՎիվաՍել-ՄՏՍ-ի աջակցությունը նոր շենքում տեսակոնֆերանսների սրահ ունենալու հարցում:
«Կրթության ասպարեզում ՎիվաՍել-ՄՏՍ-ի նվիրումը խիստ օրինակելի է և վկայում է կազմակերպության ուղղակի և շարունակական աջակցության մասին ուղղված մեր հասարակությանը», - ասել է Արմենյանը։
Տեսակոնֆերանսի սարքավորումները տրամադրվել էին ԱՄՆ Միջազգային զարգացման գործակալության (USAID) դրամաշնորհի միջոցով։
VivaCell-MTS («Ղ-Տելեկոմ») Հայաստանում բջջային կապի առաջատար օպերատորն է, որը մատուցում է ձայնային կապի և տվյալների փոխանցման ծառայությունների լայն շրջանակ։ Ընկերությունն աշխատում է Հայաստանի ողջ տարածքում, ունի GSM 900/1800 ստանդարտի համապատասխանության հավաստագիր՝ մինչև 2019թ.։
VivaCell-MTS-ի բաժնետոմսերի 80% բաժնետերը Ռուսաստանում և ԱՊՀ երկրներում բջջային կապի խոշորագույն օպերատոր «Բջջային հեռահամակարգեր» (МТС) ԲԲԸ-ն է, իսկ մնացած 20%-ը պատկանում է Fattouch Group լիբանանյան ներդրումային ընկերությանը։ Նոյեմբերի 30-ի տվյալներով, VivaCell-MTS-ի բաժանորդների թիվը Հայաստանում կազմում է 2,02 մլն։--0—
Ծանոթացեք լուրերին առաջինն ու քննարկեք դրանք մեր Telegram-ում
17:54 12.03.2009