Ռուս կիբեռհանցագործները 2013 թվականին շուրջ 2.5 մլրդ դոլար են աշխատել
ԵՐԵՎԱՆ, 15 հոկտեմբերի. /ԱՌԿԱ/. Կիբեռհանցագործության ռուսական շուկան 2013 թվականին 2.44 մլրդ դոլար է աշխատել, ասված է Group-IB ընկերության հետազոտության մեջ։ Մեկ տարի առաջ, նրանց հաշվարկներով այդ թիվը 1.93 մլրդ դոլար էր կազմել, սակայն հետազոտողներն այս անգամ հաշվել են պլաստիկ քարտերով կատարված խարդախությունները, որը 620 մլն դոլար է կազմել։
Առանց այս ցուցանիշը հաշվելու` Ռուսաստանում կիբեռհանացագործների ստացած միջոցների ծավալը կրճատվել է 5 տոկոսով և 1.82 մլրդ դոլար կազմել, հայտնում է «Վեդոմոստին»։
Group-IB–ի մասնագետները հաշվել են նաև առցանց խարդախություններից, սպամից, այլ կիբեռհանցոգործներին մատուցած ծառայություններից, DdoS գրոհներից և այլ խարդախություններից ստացված եկամուտերը։ Հետազոտությունը հիմնվում է ընկերության դիտարկման համակարգի վերլուծությունների, արագ արձագանքման կենտրոնի և cyber intelligence ծրագրի տվյալների վրա։
Հետազոտության հեղինակ Դմիտրի Վոլկովը կիբեռհանցագործությունների եկամուտների նվազումը բացատրում է այն սեկտորներում գրանցված նվազումներով, որոնք հիմնական հասույթ էին ապահովում` դրանք հիմնականում առցանց խարդախություններն են, որոնց եկամուտը նվազել է 20 մլն դոլարով կամ 4.5 տոկոսով։
Շուկայում նման նվազում է նկատվում հաջող գործառնությունների քանակի նվազման շնորհիվ։ «Այսօր ավելի բարդ է դարձել կողոպտելը, բանկերը ուժեղացրել են պաշտպանական համակարգերը, հաճախորդներն ավելի տեղեկացված են դարձել, մեծացել է բանկային ծառայությունների հեռահար համակարգերի պաշտպանությունը», –ասում է Վոլկովը։ -0-
Ծանոթացեք լուրերին առաջինն ու քննարկեք դրանք մեր Telegram-ում
11:39 15.10.2014