Միկրոէլեկտրոնիկայի հայաստանյան 4-րդ ամենամյա oլիմպիադան կանցկացվի Երեվանում 2009 թ.-ի սեպտեմբերին
ԵՐԵՎԱՆ, 20 հուլիսի. /ԱՌԿԱ/. Միկրոէլեկտրոնիկայի հայաստանյան 4-րդ ամենամյա oլիմպիադան կանցկացվի Երեվանում 2009 թ.-ի սեպտեմբերին, շաբաթ օրը «ԱՌԿԱ» գործակալությանը տեղեկացրեցին Synopsys Armenia ընկերության մամուլի ծառայությունից։
Օլիմպիադայի հիմնական նպատակն է Հայաստանում միկրոէլեկտրոնիկայի զարգացման հետագա խթանումը, երիտասարդ, տաղանդավոր կադրերի հայտնաբերումը, երիտասարդ մասնագետների մոտ միկրոէլեկտրոնիկայի նկատմամբ հետաքրքրության մեծացումը, կրթական ծրագրերում անհրաժեշտ ճշգրտումներ կատարելու նպատակով երիտասարդ մասնագետների մոտ միկրոէլեկտրոնիկայի բնագավառում գիտելիքների մակարդակի պարզաբանումը:
Օլիմպիադային կարող են մասնակցել քոլեջների, միջին մասնագիտական և բարձրագույն ուսումնական հաստատությունների ուսանողները կամ միկրոէլեկտրոնիկայի բնագավառի ընկերությունների մասնագետները: Տարիքային սահմանափակումը՝ մինչև 30 տարեկան:
Օլիմպիադայի հիմնական թեմաներն են՝ թվային ինտեգրալ սխեմաների նախագծում և թեստավորում, անալոգային և խառը ազդանշանային ինտեգրալ սխեմաների նախագծում և թեստավորում, կիսահաղորդչային սարքեր և տեխնոլոգիա, ինտեգրալ սխեմաների ավտոմատացված նախագծման մաթեմատիկական և ալգորիթմական ապահովում ։
Օլիմպիադան կանցկացվի 2 փուլով: Առաջին փուլը կանցկացվի ստուգարքի ձևով: Երկրորդ փուլը կկայանա մրցակցության ձևով՝ մասնակիցներին տրամադրելով ինքնատիպ լուծումներ պահանջող խնդիրներ:
Օլիմպիադայի հաղթողներին կհանձնվեն մրցանակներ, մասնավորապես՝ առաջին տեղի համար նախատեսված է Notebook, երկրորդ տեղի համար՝ 300 հազար դրամ, երրորդ տեղի համար՝ 150 հազար դրամ։ Նախատեսված են նաև հատուկ մրցանակներ Ամենաէլեգանտ լուծման, ամենաարդյունավետ լուծման, ամենաստեղծագործ մոտեցման, լավագույն ճարտագիտական լուծման, ամենայուրօրինակ լուծման համար, ամենաերիտասարդ մասնակցին, լավագույն արդյունք՝ աղջիկ մասնակցին, լավագույն արդյունք՝ Գյումրիից մասնակցին, լավագույն արդյունք՝ Ռադիո-հաճախականային սխեմաներ բաժնից։
Մասնակցության դիմումներն անհրաժեշտ է ներկայացնել «Synopsys Armenia» ՓԲԸ մինչև 2009 թ.-ի սեպտեմբերի 14-ը, Գյումրիից մասնակիցների համար՝ մինչև օգոստոսի 28-ը:
Օլիմպիադայի գլխավոր հովանավորն ու կազմակերպիչն է «Synopsys Armenia» ՓԲԸ-ն։ Տեղեկատվական հովանավորն է «ԱՌԿԱ» լրատվական գործակալությունը»։
Օլիմպիադան տեղի կունենա «Սինոփսիսի շաբաթը Հայաստանում» միջոցառումների շրջանակում, որը ծրագրվում է անցկացնել սեպտեմբերի երկրորդ կեսին։-0-
Ծանոթացեք լուրերին առաջինն ու քննարկեք դրանք մեր Telegram-ում
17:07 20.07.2009