ORANGE-Ի ԲԱԺԱՆՈՐԴՆԵՐԸ ԿԱՐՈՂ ԵՆ ՄԱՍՆԱԿՑԵԼ «ԲԱՐԵՎ, ՕՍԼՈ» SMS- ՄՐՑՈՒՅԹԻՆ
ԵՐԵՎԱՆ, 3 մայիսի. /ԱՌԿԱ/. Orange Armenia բջջային օպերատորի բաժանորդները կարող են մասնակցել «Բարև, Օսլո» SMS-մրցույթին, որը կմեկնարկվի մայիսի 1-ին Եվրատեսիլ-2010-ի կապակցությամբ, որը վերջին մի քանի տարիների ընթացքում Հայաստանի ամենագլխավոր երաժշտական իրադարձությունն է համարվում։
«Լինելով Եվրատեսիլ-2010-ի ապագա պաշտոնական գործընկերը` այս տարի Orange-ը բացառիկ հնարավորություն է տալիս իր բաժանորդներին մասնակցել հատուկ SMS-մրցույթին և մեկնել Օսլո, իրենց մաղթանքներն ուղարկել Եվրատեսիլ 2010-ի Հայաստանի ներկայացուցչին և անձամբ հանդիպել նրա հետ, ինչպես նաև Եվրատեսիլի եզրափակիչ համերգի հեռարձակման օրը մասնակցել հատուկ միջոցառման»,- ասվում է ընկերության մամուլի հաղորդագրությունում։
SMS-մրցույթը կազմված է երկու փուլից: Առաջին փուլը կտևի մինչև մայիսի 13-ը: Այս փուլի արդյունքում կհաստատվեն չորս լավագույն արդյունքները ցուցաբերած մասնակիցների անունները, ովքեր, հավաքելով ամենաշատ քանակի միավորները, կմեկնեն Օսլո` ներկա գտնվելու Եվրատեսիլի կիսաեզրափակիչ և եզրափակիչ համերգներին:
Այն մասնակիցները, ովքեր չեն հաղթի առաջին փուլում, կշարունակեն մրցույթը մինչև մայիսի 25-ը: 125 լավագույնները կստանան բազմաթիվ մրցանակներ:
«Բարև, Օսլո» նախաձեռնության շրջանակներում Orange-ի բոլոր բաժանորդները կարող են իրենց բարեմաղթանքներն ու քաջալերման խոսքերն ուղղել Հայաստանը ներկայացնող մասնակցին, իսկ լավագույն մաղթանքների հեղինակները, որոնց կընտրի Հայաստանի ներկայացուցիչը` Եվա Ռիվասը, անձամբ կհանդիպեն երգչուհուն և կստանան նվերներ նրա կողմից:
Եվա Ռիվասը ելույթ կունենա «Եվրատեսիլ-2010»-ում «Apricot stone» երգով (Ծիրանի կորիզ), որի երաժշտությունը գրել է կոմպոզիտոր Արմեն Մարտիրոսյանը, իսկ խոսքերը՝ Կարեն Կավալերյանը։
2010թ. Եվրատեսիլը Հայաստանի հանրային հեռուստաընկերությունը կհեռարձակի Orange-ի աջակցությամբ: Orange-ը ոչ միայն կհովանավորի Եվրատեսիլի եզրափակիչ համերգի, կիսաեզրափակիչ մրցույթների և օրագրերի հեռուստատեսային հեռարձակումը, այլ նաև Եվրատեսիլի շրջանակներում Եվրատեսիլի սիրահարներին և իր բաժանորդներին կմատուցի անսպասելի անակնկալներ:
«Orange Armenia»-ն France Telecom-ի (ապրանքանիշը՝ Orange) 100% դուստրը, հայկական շուկա է դուրս եկել 2009թ.-ի նոյեմբերի 5-ից՝ ապահովելով 83% ծածկույթ և բջջային ցանցի ու ինտերնետի հասանելիություն հանրապետության 500 համայքներում (քաղաքներում և գյուղերում): -0-
Ծանոթացեք լուրերին առաջինն ու քննարկեք դրանք մեր Telegram-ում
19:19 03.05.2010