Վերակնքվեց «Հայաստան» համահայկական հիմնադրամի և «Հայփոստ»-ի երկարամյա համագործակցության հուշագիրը
ԵՐԵՎԱՆ, 29 հոկտեմբերի./ԱՌԿԱ/. «Հայաստան» համահայկական հիմնադրամի և «Հայփոստ»-ի բարեհաջող համագործակցությունը շարունակվում է։
Արդեն հայտնի է ս/թ հեռուստամարաթոնի օրը. այն կկայանա նոյեմբերի 28-ին, ժամը՝ 22:00–ին և առաջին անգամ կհեռարձակվի Հայաստանից, հանրային հեռուստատեսության ուղիղ եթերով, հաղորդում է «Հայփոստ» ՓԲԸ–ի մամուլի ծառայությունը։
«Հայփոստը» շարունակում է օժանդակել հիմնադրամին, ուստի այս տարի ևս հուշագիր է ստորագրվել երկու կազմակերպությունների միջև՝ համաձայն որի Հայփոստը օժանդակելու է Հիմնադրամին այս տարվա մարաթոնի շրջանակներում մուտքագրված դրամական նվիրատվությունների հավաքագրման գործում։
«Հիմնադրամը շատ կարևորում է Հայփոստի հետ համագործակցությունը։ Իր ավելի քան 900 բաժանմունքներով և հենակետերով ողջ Հայաստանի Հանրապետության տարածքում՝ այն հուսալի կամուրջ է ստեղծում հիմնադրամի և քաղաքացիների միջև», – նշել է ՀՀՀ-ի գործադիր տնօրեն Հայկակ Արշամյանը:
«Հայփոստ»-ի գլխավոր գործադիր տնօրեն Հայկ Ավագյանի խոսքով. «Մեր ընկերությունը մեծ պատրաստակամությամբ և պատասխանատվությամբ է իր նպաստը բերում այն կարևորագույն առաքելությանը, որ իրականացնում է «Հայաստան» համահայկական հիմնադրամը»:
Հեռուստամարաթոնին ընդառաջ, մինչև այս տարվա ավարտ, բոլոր փոստային բաժանմունքների օպերատորները ՀՀ քաղաքացիներից կընդունեն ցանկացած չափի նվիրատվություն: Փոստային դրամահավաքի արդյունքում հավաքագրված գումարները կուղղվեն Հայաստանում և Արցախում իրականացվող ծրագրերին, որոնք միտված են ապահովելու հայկական համայնքների կայուն և համաչափ զարգացումը։
Այս տարվա հեռուստամարաթոնի առանցքային թեմաներն են խմելու ջուրը և արևային էներգիան՝ «Ես իմ անուշ Հայաստանի. կենարար ջուր և արև համայնքներին» կարգախոսով։
Լինելով հարուստ ջրային պաշարներով երկիր, ցավով պիտի նշենք, որ շատ համայնքներում դեռևս առկա են խմելու ջրի որակի և հասանելիության հետ կապված հիմնախնդիրներ։
Որակյալ և բավարար քանակով ջրամատակարարում ունենալու կարևորությունը առավել քան կենսական է։ Վստահ ենք, որ միասնական ջանքերով կարող ենք լուծել այս խնդիրը։
«Հիմնադրամը վերջին երկու տարում առանձնահատուկ ուշադրություն է դարձնում նաև վերականգնվող էներգիայի ծրագրերի իրականացմանը, որի արդյունքում հանրային նշանայություն ունեցող շենքերն ապահովված կլինեն անվճար ջեռուցմամբ և էլեկտրաէներգիայով։ Վերականգնվող էներգիայի ծրագրերի արդյունավետության շնորհիվ հնարավորություն է ստեղծվում խնայված գումարները ուղղել համայնքային կայուն և համաչափ զարգամցմանը», - նշում է Հ.Արշամյանը։
«Հայաստան» համահայկական հիմնադրամի առաքելությունը համահայկական ցանցային համակարգի ձևավորումն է, որի նպատակը Հայաստանի, Արցախի, ինչպես նաև աշխարհասփյուռ հայկական համայնքների համաչափ, կայուն և փոխկապակցված զարգացման ապահովումն է՝ հիմնվելով ընդհանուր ինքնության վրա։
«Հայփոստ» ՓԲԸ-ն Հայաստանի Հանրապետության փոստային կապի ազգային օպերատորն է, որը տրամադրում է փոստային, ֆինանսական և մանրածախ առևտրային ծառայություններ: Այժմ ‹‹Հայփոստ›› ՓԲԸ-ն իր գործունեությունը ծավալում է 900 փոստային բաժանմունքներում, որոնք գործում են ՀՀ բոլոր քաղաքներում և գյուղերում:–0–
Ծանոթացեք լուրերին առաջինն ու քննարկեք դրանք մեր Telegram-ում
16:00 29.10.2019