Երևանում, ՎիվաՍել–ՄՏՍ–ի աջակցությամբ, կկայանա «խելացի լուծումներին» նվիրված Silicon Mountains համաժողովը
ԵՐԵՎԱՆ, 2 դեկտեմբերի./ԱՌԿԱ/. Երևանում կկայանա «խելացի լուծումներին» նվիրված Silicon Mountains համաժողովը։
Silicon Mountains համաժողովի կազմակերպիչը Տեղեկատվական և հաղորդակցության տեխնոլոգիաների գործատուների միությունն է (ՏՀՏԳՄ)՝ ՀՀ բարձր տեխնոլոգիական արդյունաբերության նախարարության հետ համատեղ: Գլխավոր գործընկերը ՎիվաՍել-ՄՏՍ-ն է:
Silicon Mountains համաժողովը նվիրված է ՏՀՏ ոլորտում «խելացի լուծումներին» և համաշխարհային շուկայում առաջիկա տարիներին սպասվող զարգացումներին, հաղորդում է ՎիվաՍել–ՄՏՍ–ի մամուլի ծառայությունը։
Դեկտեմբերի 4-ին Հայաստանի ՏՀՏ ոլորտի ընկերությունները և հրավիրված արտասահմանյան փորձագետները Հայաստանի գործարար համայնքին, պետական հատվածին, ՏՀՏ կրթության ոլորտի ներկայացուցիչներին, ստարտափերին և լավագույն ուսանողներին կներկայացնեն և նրանց հետ կքննարկեն առաջիկա տարիների մարտահրավերները, ժամանակակից տեխնոլոգիաների զարգացման հեռանկարային ուղղությունները, ՏՀՏ կիրառման կարևորությունը տնտեսության տարբեր ճյուղերում։ Տեղի կունենան քննարկումներ հետևյալ թեմաներով՝ կիբերանվտանգություն, արհեստական ինտելեկտ, իրերի համացանց, ժամանակակից ՏՀՏ կրթության մարտահրավերները։
Հաջորդ օրը՝ դեկտեմբերի 5-ին կայանալիք B2B հանդիպումները ուղղված կլինեն ՏՀՏ «խելացի լուծումների» գործնական կիրառմանը տնտեսության մեջ:
Համաժողովի պատվավոր հյուրը ՏՏ ոլորտում համաշխարհային ներդրման համար ՀՀ պետական մրցանակի 2019 թվականի դափնեկիր, ճապոնացի գիտնական, դոկտոր Տակեո Կանադեն է։
ՀՀ բարձր տեխնոարդյունաբերության նախարարի տեղակալ Արմեն Աբրոյանը, կարևորելով համաժողովի անցկացումը, նշել է, որ այն վերաբերում է բարձր տեխնոլոգիական ոլորտին, որտեղ կշոշափվեն արհեստական բանականության, իրերի ինտերնետի, տեղեկատվական տեխնոլոգիաների, ՏՀՏ-ի, տնտեսությունում դրանց կիրառելիության հետ կապված հարցեր։
Նախարարի տեղակալը միջոցառման անցկացումը հատկանշական է համարել նաև նրանով, որ այն ունի պատվավոր հյուր՝ ՏՏ ոլորտում համաշխարհային ներդրման համար ՀՀ պետական մրցանակի արժանացած ճապոնացի գինական Տակեո Կանադեն։
«Համատեղ նախաձեռնության հիմքում Հայաստանում տեղեկատվական և հաղորդակցական տեղական և միջազգային տեխնոլոգիական ընկերությունների ու ճանաչում վայելող փորձագետների համար հարթակ ստեղծելն է. հարթակ, ուր հնարավոր է միասնաբար նախանշել ոլորտի զարգացման հեռանկարները: Silicon Mountains հովանու ներքո ակնկալում ենք բացահայտել ՏՀՏ հատվածում Հայաստանի ներուժը՝ գտնելով համագործակցության հեռանկարային ոլորտներ, ինտեգրելով մեր հմտություններն ու բացառիկ ունակությունները: Այս ամենի նպատակը նորարարությունների խրախուսումն է, տեխնոլոգիական առաջադիմությունը, և որ առավել կարևոր է՝ նպատակների միասնաբար իրագործումը», – ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
ՏՀՏ գործատուների միության նախագահ Արմեն Բալդրյանի խոսքով, առաջին անգամ կազմակերպվող միջազգային տեխնոլոգիական համաժողովը, որը նվիրված է ՏՀՏ ոլորտում «խելացի լուծումներին», տեխնոլոգիական կրթության մարտահրավերներին և տնտեսության թվայնացման առավելություններին, հանդիսանում է մեկնարկը՝ ամենամյա խոշոր միջազգային տեխնոլոգիական գագաթնաժողովի անցկացման համար:
«Այս տեխնոլոգիական միջոցառումը Հայաստանի և տնտեսության տարբեր ճյուղերում գործող հայկական ընկերությունների համար յուրահատուկ նախապատրաստություն է 4-րդ արդյունաբերական հեղափոխությանը։ Մեկ հարկի տակ միավորելով տեղական և համաշխարհային ճանաչում ունեցող կազմակերպություններին, տնտեսության տարբեր ոլորտների առաջատար ձեռնարկությունների ղեկավարներին, պետական և մասնավոր կազմակերպություններին, համալսարաններին՝ հնարավորություն է ստեղծվում առաջիկա տարիներին համաշխարհային տնտեսության մեջ ակնկալվող հեղափոխական փոփոխությունների հետ համընթաց շարժվել և լավագույնս օգտվել առաջացող հնարավորություններից՝ գրավելով բարենպաստ դիրքեր տնտեսության նոր ուղղություններում», – ընդգծել է Արմեն Բալդրյանը:
«Պատահական չէ, որ մեր միջոցառման անվանումը ընտրված է «Silicon Mountains»: Այն խոսում է մեր միության տեսլականի և նպատակների մասին: Միջոցառումը ևս մեկ անգամ հնարավորություն է ընձեռում մեզ տեխնոլոգիական քարտեզի վրա նշել մեր երկիրը: Երկիր, որտեղ ոչ միայն ՏՀՏ լուծումներ են կիրառվում, այն նաև մենք ենք մեր լուծումները առաջարկում արտերկրում: Միջոցառմանը բանախոսներ են լինելու համաշխարհային առաջատար կազմակերպություններից բարձրաստիճան ներկայացուցիչներ՝ ունենալու ենք թվով յոթ տեխնոլոգիական շնորհանդեսներ։ Կարծում եմ, մեզ սպասում է բավականին հետաքրքիր և հագեցած երկու օր», – նշել է ՏՀՏԳՄ տնօրեն Էդուարդ Մուսայելյանը:
ՎիվաՍել-ՄՏՍ-ը (ՄՏՍ Հայաստան ՓԲԸ) Հայաստանի շարժական կապի առաջատար օպերատորն է, որն ունի ամենաընդարձակ ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, ՎիվաՍել-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: ՎիվաՍել-ՄՏՍ-ը նորարարությունների առաջատարն է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: ՎիվաՍել-ՄՏՍ-ն իր գործունեության մեջ առաջնորդվում է ISO 26000 (Սոցիալական պատասխանատվության միջազգային ստանդարտ) և ISO/IEC 27001:2013 (Տեղեկատվական անվտանգության կառավարման համակարգ) ստանդարտներով: Հավելյալ տեղեկություններ ստանալու համար այցելեք www.mts.am։–0–Ծանոթացեք լուրերին առաջինն ու քննարկեք դրանք մեր Telegram-ում
20:42 02.12.2019
