Ղարաբաղն առաջին անգամ մասնակցում է «Վիքին սիրում է հուշարձաններ» համաշխարհային մրցույթին
ՍՏԵՓԱՆԱԿԵՐՏ, 17 սեպտեմբերի. /ԱՌԿԱ/. Արցախի Հանրապետությունում մեկնարկել է «Վիքին սիրում է հուշարձաններ» համաշխարհային մրցույթի ղարաբաղյան մասը, հաղորդում է Արցախի Հանրային հեռուստատեսությունը։
Հաղորդագրության համաձայն, Շուշիում ԼՂՀ կառավարությանն առընթեր զբոսաշրջության և պատմական միջավայրի պահպանման վարչության տեղեկատվական գրասենյակում «Վիքիմեդիա Հայաստան» գիտակրթական նախամասնագիտական կրթության ներկայացուցիչները մասնակիցներին ներկայացրել են մրցույթի էությունն ու առանձնահատկությունները։
«Վիքիմեդիա Հայաստան» խորհրդի անդամ Մհեր Բեքարյանը հայտնեց, որ նախագծի կարևոր առանձնահատկությունն այն է, որ Շուշիում արված լուսանկարները բեռնվելու են Վիքիպահեստում` «Վիքիմեդիա» հանրագիտարանի պատմական հուշարձանների բաժինն Արցախի տեսարժան վայրերով համալրելու համար։
ԼՂՀ զբոսաշրջության և պատմական միջավայրի պահպանման վարչության պետ Սերգեյ Շահվերդյանն իր հերթին նշել է, որ այդ նախագիծը լավ առիթ է աշխարհին Արցախի մշակութային ժառանգությունը ներկայացնելու համար։
«Վիքին սիրում է հուշարձաններ» մրցույթը, որն անցկացվում է սեպտեմբերի 1–30–ը 50 երկրներում, առաջին անգամ տեղի է ունեցել 2010թ.–ին Հոլանդիայում, իսկ 2011թ.–ից դարձել է միջազգային և արդեն հասցրել է ընդգրկվել Գինեսի գրքում` որպես աշխարհի ամենախոշոր ֆոտոմրցույթ։
Մրցույթի մասնակցելու համար ընդունվում են ինչպես սեպտեմբերի ընթացքում, այնպես էլ մինչև մրցույթն արված լուսանկարներ։
«Վիքիմեդիա Հայաստան» ՀԿ–ը ստեղծվել է 2013թ.–ի օգոստոսի սկզբին։ Կազմակերպության նպատակն է Վիքիմեդիա նախագծերի (Վիքիմեդիա, Վիքիպահեստ, Վիքիգրքեր և այլն) հարստացման գործում լայն շերտերի ներգրավման ճանապարհով տեղեկատվական հանրության ձևավորմանն աջակցելը։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:05 17.09.2013