Առաջին միկրոպրոցեսորի նախագծողը Հայաստանի պետական ճարտարագիտական համալսարանի պատվավոր դոկտոր է դարձել
ԵՐԵՎԱՆ, 22 նոյեմբերի. /ԱՌԿԱ/. «Intel 4004» աշխարհի առաջին միկրոպրոցեսորի նախագծող Ֆեդերիկո Ֆաջինին Հայաստանի պետական ճարտարագիտական համալսարանի (ՀՊՃՀ) պատվավոր դոկտորի կոչում է շնորհվել:
2012թ.-ին Ֆեդերիկո Ֆաջինը նաև արժանացավ ՀՀ նախագահի մրցանակին՝ ՏՏ ոլորտում համաշխարհային ներդրման համար:
ՀՊՃՀ ռեկտորի և դասախոսական կազմի հետ հանդիպման ընթացքում Ֆաջինը ներկայացրեց Հայաստանում տեղեկատվական տեխնոլոգիաների ոլորտի զարգացման իր տեսակետները։
«Ես դեռ չեմ կարող լիարժեք խոսել Հայաստանում ՏՏ ոլորտի զարգացման աստիճանի մասին, քանի որ դեռ չեմ հասցրել մանրամասն ծանոթանալ, սակայն հասցրել եմ հասկանալ, որ Հայաստանը շարժվում է տեխնոլոգիաների զարգացման ուղղությամբ, և այդ ուղղության մեջ ամենագլխավորը ես համարում եմ համալսարանի գործունեությունը, քանի որ դրա արդյունավետությունն ակնհայտ է»,- ասաց Ֆաջինը:
Նա ընդգծեց, որ կադրերի պատրաստումն առաջնահերթ է և շատ կարևոր պայման է ցանկացած երկրում ոլորտի զարգացման համար:
«Ես շատ տաղանդավոր մարդկանց եմ տեսնում, ովքեր հիանալի գաղափարներ ունեն, ինչը կրթության շարժիչ ուժն ու նորարարական միջավայրի զարգացումն է»,- ընդգծեց Ֆաջինը:
Փորձագետը նաև հատուկ դասախոսություն անցկացրեց ՀՊՃՀ-ի ուսանողների և դասախոսների համար:
Առաջին միկրոպրոցեսորը հայտնագործվել է 40 տարի առաջ` 1971թ.-ին «Intel» ընկերությունում և ստացավ «Intel 4004» անվանումը: Այդ միկրոսխեման համարվում է աշխարհի առաջին առևտրային հասանելի միաբյուրեղ միկրոպրոցեսորը: Միկրոպրոցեսորը հեղափոխական նշանակություն է ունեցել համակարգչային տեխնոլոգիաների զարգացման համար: «Intel 4004»-ն արտադրվել է մինչև 1986թ.-ը:
Ֆրեդերիկո Ֆաջինն ինքը բազմիցս ասել է, որ նույնիսկ չէր կարող պատկերացնել թվային հեղափոխության ծավալները, որի հիմքն իր օգնությամբ դրվեց:
Այսօր Ֆաջինը սպառողական ինտերֆեյսերի մշակման գծով Synaptics – ընկերության տնօրենների խորհրդի պատվավոր նախագահն է, որը նա հիմնադրել է 1986թ.-ին՝ Կարվեր Միդի հետ: Ֆաջինը նաև հետազոտություն է անցկացնում, որը վերաբերում է մարդկային բանականության կազմակերպման սկզբունքներին: Ըստ հետազոտողի՝ այդ բացահայտումները պետք է ճանապարհ բացեն տեղեկատվության մշակման սկզբունքները հասկանալու համար: -0-
Ծանոթացեք լուրերին առաջինն ու քննարկեք դրանք մեր Telegram-ում
16:38 22.11.2012