Շարժական կապի համարների տեղափոխելիության մեկնարկը նախատեսված է 2014թ.-ի հունվարին. ՀԾԿՀ
ԵՐԵՎԱՆ, 14 դեկտեմբերի. /ԱՌԿԱ/. ՀՀ հանրային ծառայությունները կարգավորող հանձնաժողովի` դեկտեմբերի 4-ին կայացած նիստում քննարկվել է «Շարժական կապի հեռախոսահամարների տեղափոխելիության համակարգի ներդրման սկզբունքների և ժամանակացույցի մասին» հարցը:
Ինչպես նշված է ՀԾԿՀ մամուլի ծառայության տարածած հաղորդագրության մեջ, ՀՀ հանրային ծառայությունները կարգավորող հանձնաժողովի կողմից իրականացվող համարների տեղափոխելիության համակարգի ներդրման աշխատանքների ընթացքում, միջազգային փորձի ուսումնասիրության նպատակով, Վերակառուցման և զարգացման եվրոպական բանկի կողմից ցուցաբերվել է տեխնիկական աջակցություն:
Մշակված նախագծի քննարկման արդյունքում սահմանվել են նշյալ համակարգի ներդրման սկզբունքներն ու հետագա գործողությունների ժամանակացույցը.
1. համակարգը գործարկվելու է 2014 թվականի հունվարի 1-ից,
2. հեռախոսահամարների տեղափոխելիությունը բաժանորդների համար իրականացվելու է 3, իսկ հետագայում՝ 1 աշխատանքային օրվա ընթացքում,
3. հեռախոսահամարների տեղափոխելիությունը բաժանորդների համար իրականացվելու է անվճար:-0-
Ծանոթացեք լուրերին առաջինն ու քննարկեք դրանք մեր Telegram-ում
20:11 14.12.2012