Հայկական շուկայում սմարթֆոնների մասնաբաժինը գերազանցում է 20 տոկոսը. «ԱրմենՏել»
ԵՐԵՎԱՆ, 22 նոյեմբերի. /ԱՌԿԱ/. Հայկական շուկայում սմարթֆոնների մասնաբաժինը գերազանցում է 20 տոկոսը, ասաց «ԱրմենՏել» ՓԲԸ–ի գլխավոր տնօրեն Անդրեյ Պյատախինը։
«Հայկական շուկայում թանկարժեք սմարթֆոններից օգտվողների մասնաբաժինը ավելի մեծ է, քան եվրոպական շատ երկրներում, ընդ որում նկատվում է շատ դինամիկ և մեծ աճ», – ասաց Պյատախինը «AppCON 2013. բջջային բովանդակության զարգացումը Հայաստանում» թեմայով համաժողովի ընթացքում։
Նա նաև նշեց, որ միայն ընկերության ցանցում սմարթֆոնների թվի աճը տարեսկզբից գերազանցում է 30 տոկոսը` ավելացնելով, որ շատ բաժանորդներ լիարժեք չեն օգտվում իրենց սմարթֆոնի բոլոր գործառույթներից։
Նրա խոսքերով` հայ բաժանորդները պասիվ են սմարթֆոններով ինտերնետի և բջջային հավելվածների կիրառման տեսակետից, և նույնիսկ օգտվելու դեպքում կիրառվում են միայն սահմանափակ գործառույթները։
Միաժամանակ բաժանորդները շատ չեն վստահում էլեկտրոնային և բջջային վճարումներին` համարելով դրանք չպաշտպանված։
Աշխարհում ավելի ակտիվ օգտագործվող բջջային հավելվածների շրջանում Պյատախինը նշեց խաղերը, եղանակը, նավիգացիան, սոցիալական ցանցերն ու երաժշտությունը։
«AppCON 2013. բջջային բովանդակության զարգացումը Հայաստանում» թեմայով համաժողովի կազմակերպիչն է «Տեխնոլոգիական զարգացման կենտրոն» հիմնադրամը` «ԱրմենՏել» ընկերության (ապրանքանիշը Beeline) աջակցությամբ։ Համաժողովի տեղեկատվական հովանավորը telecom.arka.am հեռահաղորդակցական կայքն է։ –0–
Ծանոթացեք լուրերին առաջինն ու քննարկեք դրանք մեր Telegram-ում
14:26 22.11.2013