ՎիվաՍել-ՄՏՍ ընկերությունը ներդրել է 42,2 Մբիթ/վրկ արագություն ապահովող Dual Carrier HSDPA ցանց Հայաստանի 615 բնակավայրերում

ԵՐԵՎԱՆ, 6 փետրվարի. /ԱՌԿԱ/. ՎիվաՍել-ՄՏՍ ընկերությունը ներդրել է 42,2 Մբիթ/վրկ արագություն ապահովող Dual Carrier HSDPA ցանց Հայաստանի 615 (48 քաղաքում և 567 գյուղում) բնակավայրում, հայտնում է ընկերության մամուլի ծառայությունը։

«2013-ին Հայաստանի ևս 612 բնակավայրում հասանելի դարձավ ներբեռնման համար մինչև 42,2 Մբիթ/վրկ արագություն ապահովող՝ ՎիվաՍել-ՄՏՍ-ի Dual Carrier HSDPA ցանցը»,– ասվում է հաղորդագրությունում։

Մամուլի ծառայությունը հիշեցրեց նաև, որ Հայաստանում հեռահաղորդակցության առաջատար օպերատորի կողմից Dual Carrier HSDPA տեխնոլոգիան երկրում ներդրվել էր 2012թ.-ի հունվարին և սկզբնական շրջանում հասանելի էր Հայաստանի երեք ամենախոշոր քաղաքներում՝ Երևանում, Գյումրիում և Վանաձորում:

2013 թվականին Dual Carrier HSDPA տեխնոլոգիան շահագործման հանձնվեց Տավուշի, Գեղարքունիքի, Լոռու, Կոտայքի, Արագածոտնի և Շիրակի մարզերի ամբողջ տարածքում, ինչպես նաև՝ Արարատի, Արմավիրի, Սյունիքի և Վայոց Ձորի բոլոր քաղաքներում: Այսօրվա դրությամբ, Dual Carrier HSDPA ցանցը գործում է Հայաստանի բնակեցված տարածքի ավելի քան 86 տոկոսում: Առաջիկայում նախատեսվում է այն հասանելի դարձնել երկրի բոլոր բնակավայրերում:

«Ներկա դրությամբ՝ ներբեռնման մինչև 42,2 Մբիթ/վրկ արագություն ապահովող Dual Carrier HSDPA ցանցն ընդգրկում է Հայաստանի 615 (48 քաղաք և 567 գյուղ) բնակավայր»,– հաղորդում է մամուլի ծառայությունը։

Ներբեռնման առավելագույնը 42,2 Մբիթ/վրկ արագություն ապահովող Dual Carrier HSDPA ցանցի շնորհիվ ՎիվաՍել-ՄՏՍ-ի բաժանորդները համացանցի առավելություններից օգտվելու ավելի մեծ հնարավորություն են ստանում՝ թե աշխատանքի, և թե պարզապես ժամանցի համար (առցանց խաղեր, ֆիլմերի դիտում՝ առանց ընդհատումների և այլն):

Հաղորդման մեջ նշվում է նաև, որ ցանցի ընդլայնման և արդիականացման վերաբերյալ որոշումներ կայացնելիս` ՎիվաՍել-ՄՏՍ-ը չի առաջնորդվում բացառապես ներդրումների վերադարձելիության (Return on Investment) սկզբունքով:

«Կայանների տեղադրումը և շարժական կապի ձայնային ու ինտերնետ հասանելիության ամենաժամանակակից ծառայությունների ապահովումը ՎիվաՍել-ՄՏՍ-ի համար առաջնային խնդիրներ են, քանի որ կապի ենթակառուցվածքի առկայությունը սոցիալական և ռազմավարական հարց է»,– նշեցին մամուլի ծառայությունից։

HSDPA (High-Speed Downlink Packet Access) տվյալների փոխանցման գերարագ փաթեթային հաղորդում է բազային կայանից բջջային հեռախոսին։

ՎիվաՍել-ՄՏՍ-ը (Ղ-Տելեկոմ ՓԲԸ) Հայաստանի շարժական կապի առաջատար օպերատորն է, որն ունի ամենահզոր 2G/3.75G/4G ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: -0-

Ծանոթացեք լուրերին առաջինն ու քննարկեք դրանք մեր Telegram-ում

18:34 06.02.2014