Հայաստանի գյուղական դպրոցների ավելի քան 70 ուսուցիչներ համակարգչային գրագիտության բարձրացման անվճար դասընթացներ են անցել

ԵՐԵՎԱՆ, 10 մայիսի. /ԱՌԿԱ/. «ԱրմենՏել» ՓԲԸ (ապրանքանիշը Beeline) և Հայաստանի մանուկներ հիմնադրամը հայտարարում են Հայաստանի 2 մարզերում ուսուցիչների համար համակարգչային գրագիտության բարձրացմանն ուղղված նախագծի առաջին փուլի ավարտի մասին, «ԱՌԿԱ» գործակալությանը հայտնեցին «Արմենտելի» մամուլի ծառայությունից: 

2012թ-ի փետրվարի 27-ից Հայաստանի 6 գյուղի 74 ուսուցչի համար կազմակերպվել են հատուկ համակարգչային դասընթացներ: 

Հաղորդագրության համաձյան՝ մանկավարժները ձեռք են  բերել համակարգչային նոր հմտություններ և ծանոթացել կրթական գործընթացում ժամանակակից տեխնոլոգիաների կիրառմանը: 

«Այսօր համակարգիչներ կան շատ ընտանիքներում և բոլոր դպրոցներում, և մեր նախագծի նպատակն է, որպեսզի ուսուցիչներն ու աշակերտները կարողանան ժամանակակից տեխնոլոգիաների օգնությամբ ստանալ նոր գիտելիքներ: Վստահ եմ, որ մեր համատեղ նախաձեռնության շնորհիվ ուսուցիչները կկարողանան կիրառել նոր մոտեցումներ կրթական գործընթացում, իսկ աշակերտները կստանան գիտելիքի նոր աղբյուրների հետ աշխատելու հնարավորություններ», - նշեց «ԱրմենՏել» ՓԲԸ Գլխավոր տնօրեն Իգոր Կլիմկոն:  

Ծրագրի առաջին փուլն իրականացվել է Արմավիրի և Արագածոտնի մարզերի Դալարիկ, Քարակերտ, Մյասնիկյան, Շենիկ, Արագածավան և Արտենի գյուղերում: Երկրորդ փուլին կմասնակցի ևս 76 ուսուցիչ: 

«ԱրմենՏել» ընկերության և  Հայաստանի մանուկներ հիմնադրամի փոխգործակցությունն իրականացվում է երկարատև համագործակցության մասին հուշագրի շրջանակում: Փաստաթղթի համաձայն, «ԱրմենՏել» ընկերությունը հովանավորում է Հայաստանի մանուկներ հիմնադրամի կրթական, բնապահպանական և սոցիալական մի շարք ծրագրերի իրականացումը:

«ԱրմենՏել» ՓԲԸ-ն (ապրանքանիշը՝ Beeline) հանդիսանում է «ՎիմպելԿոմ» ընկերությունների խմբի մի մասը: «ՎիմպելԿոմը» հանդիսանում է աշխարհի խոշորագույն ինտեգրված օպերատորներից մեկը, որն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման,  այնպես էլ լայնաշերտ ինտերնետ հասանելիության ծառայություններ: –0-