Հայաստանի բնակիչները Ամանորի գիշերը 9,3 մլն. SMS են ուղարկել և ավելի քան 61 զանգ են կատարել
ԵՐԵՎԱՆ, 20 հունվարի. /ԱՌԿԱ/. Հայաստանի բնակիչները Ամանորի գիշերը 9,3 մլն. SMS հաղորդագրություն են ուղարկել և ավելի քան 61 զանգ են կատարել։ Այդ մասին վկայում են Հայաստանի երեք բջջային կապի օպերատորների` Ամանորին վերաբերող տվյալները։
Առավել ակտիվ են եղել VivaCell-MTS ընկերության բաժանորդները. ընկերության ցանցը Ամանորի գիշերը սպասարկել է ավելի քան 40 մլն. զանգ։ «Արմենտել» ընկերության ցանցը (Beeline ապրանքանիշ) Ամանորի գիշերը սպասարկել է ավելի քան 14,7 մլն. զանգ, իսկ Orange Armenia-ն ` մոտ 6,3 մլն. զանգ։
Չնայած ձայնային ծառայությունների նման ակտիվությանը` վերջին ժամանակներս նկատվում է նաև Ամանորի օրերին SMS հաղորդագրությունների մասնաբաժնի աճի մեծ միտում։ Տվյալ ուղղությամբ ամենամեծ ակտիվությունը ցուցաբերել են VivaCell-MTS-ի բաժանորդները, Նոր Տարվա գիշերը ընկերության ցանցը սպասարկել է 7,5 մլն. SMS հաղորդագրություն, բարձր ակտիվություն են ցուցաբերել նաև «Արմենտելի» բաժանորդները, որոնք ուղարկել և ստացել են ավելի քան 1,2 մլն. SMS հաղորդագրություն, իսկ ամենաքիչ թվով հաղորդագրություններ սպասարկել է Orange Armenia-ի ցանցը, որի բաժանորդները ցուցաբերել են ամենաքիչ ակտիվությունը` ընդամենը 607 հազ. SMS հաղորդագրություն։
Միաժամանակ միայն «ԱրմենՏել» ընկերությունն է տվյալներ ներկայացրել Ամանորին ինտերնետ տրաֆիկի վերաբերյալ։ Այսպես, ընկերության հաղորդագրության մեջ նշվում է, որ ընկերության տվյալների փոխանցման արտաքին ալիքներով դեկտեմբերի 31–ին և հունվարի 1–ին ընդհանուր առմամբ փոխանցվել է ավելի քան 347 տերաբայթ ինտերնետ տրաֆիկ, իսկ ընդհանուր առմամբ Ամանորի և Սուրբ Ծննդի ժամանակ, դեկտեմբերի 31–ից մինչև հունվարի 7–ն ընկած ժամանակահատվածում, Beeline բջջային ցանցի և լայնաշերտ ինտերնետի բաժանորդներն օգտագործել են ավելի քան 1.5 ՊԲ ինտերնետ տրաֆիկ։ Համեմատության համար նշենք, որ էլեկտրոնային Վիքիպեդիա հանրագիտարանի տվյալների համաձայն, Яндекс.Փոստում պահպանվող նամակները զբաղեցնում են 10 ՊԲ ծավալ։
Ինչպես նշում են օպերատորները, չնայած Ամանորի գիշերը բաժանորդների ակտիվության զգալի աճին, բջջային կապի ցանցերը կարողացել են սպասարկել գերծանրաբեռնվածության պայմաններում և աշխատել են կայուն։ Օպերատորների տեղեկատվությամբ` ընկերությունների բոլոր տեխնիկական համակարգերն աշխատել են կայուն ինչպես Ամանորի գիշերը, այնպես էլ հետագա հանգստյան օրերի ընթացքում։
Ինչպես ցույց է տալիս վիճակագրությունը, հայ բաժանորդների շրջանում ավանդական ժողովրդականություն է վայելում ձայնային կապը։ Ընդհանուր առմամբ վերջին տարիների միտումները ցույց են տալիս, որ Հայաստանի բնակիչները նախընտրում են շնորհավորել իրենց մտերիմներին հենց հեռախոսազանգերի միջոցով։ Բոլոր երեք օպերատորների մոտ հիմնական ծանրաբեռնվածությունը բաժին է ընկել հենց ձայնային ծառայություններին։
Հայկական շուկայում գործում է բջջային կապի երեք օպերատոր` «ԱրմենՏել» ընկերությունը (Beeline ապրանքանիշով, որը ռուսական «ՎիմպելԿոմ» ընկերության 100 տոկոսանոց դուստր ընկերությունն է), VivaCell-MTS–ը (ՄՏՍ–ի դուստր) և Orange Armenia–ն (France Telecom–ի դուստր)։–0–
Ծանոթացեք լուրերին առաջինն ու քննարկեք դրանք մեր Telegram-ում
12:38 20.01.2014