Արագածոտնի հինգ ընտանիք օգտվել է VivaCell-MTS-ի և «Ֆուլեր Տնաշինական Կենտրոնի» բնակարանաշինության ծրագրից
ԵՐԵՎԱՆ, 15 մարտի. /ԱՌԿԱ/. ՎիվաՍել-ՄՏՍ ընկերությունը և «Ֆուլեր Տնաշինական Կենտրոնը» համատեղ բնակարանաշինական ծրագրի շրջանակում ավարտել են Արագածոտնի մարզի Զարինջա, Կաքավաձոր և Ավան համայնքների հինգ ընտանիքների տների բարեկարգման աշխատանքները, հաղորդում է ընկերության մամուլի ծառայությունը:
«Այս համատեղ ծրագրի նպատակը վաղվա օրվա նկատմամբ հավատ արթնանցելն է, միաժամանակ՝ պատասխանատու արժեհամակարգ փոխանցելը: Անչափ կարևոր է, որ մեր հայրենակիցներն զգան, որ մենակ չեն իրենց հոգսերի մեջ: Այդ հավատն անհրաժեշտ է կայացած երկիր ունենալու համար», - հայտարարել է է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Կողմերի աջակցության արդյունքում ավարտվել է 4 կիսակառույցի շինարարություն: Հիմնովին փոխվել են ևս մեկ տան տանիքն ու պատուհանները:
Հայաստանի «Ֆուլեր Տնաշինական Կենտրոնի» նախագահ Աշոտ Եղիազարյանն իր հերթին հայտարարել է, որ ընկերությունը հպարտ է ՎիվաՍել-ՄՏՍ-ի հետ գործընկերության համար:
«Մարդկային էության ամենակարևոր առանձնահատկությունը կարեկցելու, օգնության ձեռք մեկնելու կարողությունն է: Ընդ որում՝ ոչ թե այն ժամանակ, երբ հարմար է, այլ՝ երբ անհրաժեշտ է: Հինգ տարվա ընթացքում ՎիվաՍել-ՄՏՍ-ն աջակցել է 135 ընտանիքի՝ երջանկության ու ապագայի հանդեպ լավատեսության զգացում փոխանցելով 677 մարդու», - ասել է նա:
Հինգ տարվա ընթացքում այդ նպատակով ներդրվել է ավելի քան 333 մլն դրամ, ինչի արդյունքում բարելավվել է 135 ընտանիքի կյանքի որակը: Համագործակցության արդյունքում, Հայաստանի տասը մարզում, միայն 2016 թվականին բնակարանի խնդիր է հաղթահարել 42 ընտանիք:
ՎիվաՍել-ՄՏՍ (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-Ծանոթացեք լուրերին առաջինն ու քննարկեք դրանք մեր Telegram-ում
18:42 15.03.2017
