«Եվրատեսիլի» մասնակից Արծվիկն այցելել է «Արմաթ» ինժեներական լաբորատորիա
ԵՐԵՎԱՆ, 4 մայիսի. /ԱՌԿԱ/. «Եվրատեսիլ 2017»-ի հայաստանյան դեսպան Արծվիկը այցելել է Աշտարակի «Արմաթ» ինժեներական լաբորատորիա, հայտնում է Ucom ընկերության մամուլի ծառայությունը:
Հանրահաշվի, երկրաչափության և ֆիզիկայի դասընթացների ժամանակ սերտած գիտելիքները գործնականում կիրառող այս խմբակի սաները զարմացրել են երգչուհուն համակարգչով մոդելավորելու, եռաչափ տպիչով առարկաներ տպելու, խաղեր ծրագրավորելու ու անիմացիա ստեղծելու իրենց կարողություններով:
«Շատ բաներում ենք հմտացել, իսկ ներկա պահին նախապատրաստվում ենք կարևոր մրցույթի, որի համար պատրաստել ենք ռոբոտ: Փոքր դետալներ կան շտկելու, ջանք չենք խնայի դրա համար, քանի որ բոլորս երազում ենք հաղթել այդ մրցույթում», - ասել է «Արմաթի» սան Աննա Գրիգորյանը:
Ռոբոտը, որին երեխաները զրոյից ինքնուրույն են պատրաստել, հատուկ տարածության մեջ պետք է շարժվի և առարկաներ հավաքի: Աշխատանքի մեծ մասն արված է, ծրագրային որոշ շտկումների կարիք կա միայն:
Երեխաները Արծվիկին մաղթել են «տրիումֆ» իր ելույթի ժամանակ ու շնորհակալություն են հայտնել անսպասելի այցի համար:
ԻՏՁՄ-ի և Ucom ընկերության միջև ստորագրված համագործակցության հուշագրի համաձայն՝ Ucom ընկերությունը ներդրումներ է կատարում, որպեսզի Հայաստանի 9 մարզերում բացվեն «Արմաթ» անվանումը կրող շուրջ 70 ինժեներական խմբակ-լաբորատորիաներ։
«Արմաթ» ինժեներական լաբորատորիաների կրթական ծրագիրը նպատակ ունի խթանելու տեխնոլոգիական կրթությունը Հայաստանի համայնքների բոլոր դպրոցներում, նպաստելու աշակերտների մոտ ժամանակակից բարձր տեխնոլոգիաների նկատմամբ հետաքրքրության առաջացմանը, վաղ տարիքից ճարտարագիտական մտածելակերպի զարգացմանը և բանիմաց ուսանողների նախապատրաստմանը։
«Արմաթ» ինժեներական խմբակ-լաբորատորիաներում մշակված ծրագրային փաթեթները, ինչպես նաև սարքավորումների գծագրերը բաց են հանրության համար։ Խմբակ-լաբորատորիաների համար ծրագրային միջոցներ ձեռք բերելիս նախապատվություն է տրվում տեղական արտադրողին, ինչի վառ օրինակ են հանդիսանում Հայաստանում արտադրված բարձրակարգ եռաչափ (3D) տպիչները, մինի համակարգիչները, ռոբոտաշինության հավաքածուները և այլ սարքերը։
Ucom (Universal Communications) հայկական ընկերությունը հիմնադրվել է 2007 թ.: Հանդիսանալով Հայաստանյան հեռահաղորդակցային շուկայի առաջատարներից մեկը, Ucom ընկերությունը առաջարկում է այս ոլորտում ծառայությունների լիարժեք շարք՝ գերարագ սիմետրիկ ինտերնետ, IP հեռուստատեսություն և ֆիքսված թվային հեռախոսակապ: Համագործակցելով Ericsson ընկերության հետ, Ucom-ը կառուցում է նոր սերնդի ամենամեծ օպտիկամանրաթելային ցանցը Հայաստանում:-0-
Ծանոթացեք լուրերին առաջինն ու քննարկեք դրանք մեր Telegram-ում
17:09 04.05.2017