ՀՀ նախագահը մասնակցել է «Թումո Կողբ» կենտրոնի հիմնարկեքին և այցելել «Արմաթ» ինժեներական լաբորատորիա
ԵՐԵՎԱՆ, 6 հունիսի./ԱՌԿԱ/. ՀՀ նախագահ Սերժ Սարգսյանը Տավուշի մարզ այցի շրջանակում այսօր մասնակցել է ապագա «Թումո Կողբ» կենտրոնի շենքի հիմնարկեքի արարողությանը:
Կենտրոնի կառուցման ու հիմնադրման համար անհրաժեշտ միջոցներն ու աջակցությունն ապահովել են Ucom և Mission Enfance ընկերությունները, «Կողբ» հիմնադրամը, «Թումոն», ինչպես նաև մի շարք սփյուռքահայ բարերարներ:
Ucom ընկերության հաղորդագրության համաձայն, «Թումո Կողբը» կունենա ուսանողների կրթական ընթացքն ապահովելու համար անհրաժեշտ դասասենյակներ, ինքնուսուցման հարթակ, ձայնագրման ստուդիա, կինոթատրոն, սպորտային պարապմունքների և ժամանցի համար նախատեսված բացօթյա դարատափ։ Պաշտպանության նախարարության համագործակցությամբ կենտրոնում պլանավորվում է անցկացնել նաև «Թումո Բանակ» նախագիծը, որի շնորհիվ կենտրոնի հարևանությամբ գտնվող զորամասի ժամկետային զինծառայողները նույնպես կկարողանան ներգրավվել «Թումոյի» ծրագրում։
Շարունակելով ծանոթանալ Տավուշի մարզի շնորհաշատ դպրոցականների համար ստեղծված հնարավորություններին՝ նախագահ Սարգսյանն այցելեց նաև Կողբի «Արմաթ» ինժեներական խմբակ-լաբորատորիա, որտեղ ծանոթացել է մարզի համանման տասնյակ լաբորատորիաներում ուսանող լավագույն սաների աշխատանքներին:
Ucom ընկերության և «Ինֆորմացիոն տեխնոլոգիաների ձեռնարկությունների» միության (ԻՏՁՄ) ներկայացուցիչները նախագահին պատմել են, որ «Արմաթ» լաբորատորիայում ինժեներական և ծրագրավորման գիտելիքներ ու հմտություններ ձեռք բերող սաները խմբակ են հաճախում 5-րդ դասարանից և փորձում են հանրահաշվի, երկրաչափության և ֆիզիկայի դասընթացների ժամանակ սերտած գիտելիքները գործնականում կիրառել:
«Երեխաներն ինքնուրույն են ու ստեղծարար, կարող են ոչ միայն համակարգչի օգնությամբ առարկաների եռաչափ մոդելավորում կատարել, այլև տպել դրանք, խաղեր ծրագրավորել, անիմացիաներ ու ռոբոտներ ստեղծել», - նշված է հաղորդագրության մեջ:
«Ucom-ը կարևորում է գյուղերում բնակվող երեխաների ներգրավվածությունը «Արմաթ» ինժեներական լաբորատորիաների կրթական նախագծերում, որովհետև այստեղ նրանք սովորում են մտածել ու ստեղծել: Ուրախ եմ, որ համապետական մասշտաբով իրականացվող այս արդեն հայտնի դարձած նախագիծն արժանացել է նաև երկրի նախագահի ուշադրությանը», - ասել է Ucom ընկերության գլխավոր տնօրեն Հայկ Եսայանը:
Նշենք, որ ԻՏՁՄ-ի և Ucom ընկերության միջև ստորագրված համագործակցության հուշագրի համաձայն՝ Ucom ընկերությունը ներդրումներ է կատարում, որպեսզի Հայաստանի 9 մարզերում բացվել են «Արմաթ» անվանումը կրող շուրջ 70 ինժեներական խմբակ-լաբորատորիաներ։ Ucom ընկերության գլխավոր տնօրեն Հայկ Եսայանը անձամբ պարբերաբար այցելում է արդեն գործող «Արմաթ» խմբակներ, շփվում դպրոցականների հետ, ծանոթանում նրանց ձեռքբերումներին ու առաջադիմությանը:
«Արմաթ» ինժեներական լաբորատորիաների կրթական ծրագիրը նպատակ ունի խթանելու տեխնոլոգիական կրթությունը Հայաստանի համայնքների բոլոր դպրոցներում, նպաստելու աշակերտների մոտ ժամանակակից բարձր տեխնոլոգիաների նկատմամբ հետաքրքրության առաջացմանը, վաղ տարիքից ճարտարագիտական մտածելակերպի զարգացմանը և բանիմաց ուսանողների նախապատրաստմանը։
«Արմաթ» ինժեներական խմբակ-լաբորատորիաներում մշակված ծրագրային փաթեթները, ինչպես նաև սարքավորումների գծագրերը բաց են հանրության համար։ Խմբակ-լաբորատորիաների համար ծրագրային միջոցներ ձեռք բերելիս նախապատվություն է տրվում տեղական արտադրողին, ինչի վառ օրինակ են Հայաստանում արտադրված բարձրակարգ եռաչափ (3D) տպիչները, մինի համակարգիչները, ռոբոտաշինության հավաքածուները և այլ սարքերը։
Ucom (Universal Communications) հայկական ընկերությունը հիմնադրվել է 2007 թ.: Հանդիսանալով Հայաստանյան հեռահաղորդակցային շուկայի առաջատարներից մեկը, Ucom ընկերությունը առաջարկում է այս ոլորտում ծառայությունների լիարժեք շարք՝ գերարագ սիմետրիկ ինտերնետ, IP հեռուստատեսություն և ֆիքսված թվային հեռախոսակապ: Համագործակցելով Ericsson ընկերության հետ, Ucom-ը կառուցում է նոր սերնդի ամենամեծ օպտիկամանրաթելային ցանցը Հայաստանում: -0-
Ծանոթացեք լուրերին առաջինն ու քննարկեք դրանք մեր Telegram-ում
17:36 06.06.2017