ՀՀ քաղաքացիները կստանան պաշտոնական e-mail և մոբայլ ID քարտեր

ԵՐԵՎԱՆ, 24 մայիսի. /ԱՌԿԱ/. Հայաստանի բոլոր քաղաքացիները կստանան պաշտոնական e-mail և մոբայլ ID քարտ, երեքշաբթի խորհրդարանական հանձնաժողովներում 2015 թ.–ի պետբյուջեի կատարողականի քննարկման ժամանակ ասաց ՀՀ կառավարության աշխատակազմի ղեկավար–նախարար Դավիթ Հարությունյանը։

Նրա խոսքով` ՀՀ կառավարությունը հետևողական աշխատանք է իրականացնում` ուղղված էլեկտրոնային, պետական ծառայությունների ոլորտի ձևավորմանը, երկրում արդեն ներդրվել է էլեկտրոնային ստորագրության համակարգն ու ID քարտերը։

Նա նշեց, որ ծրագրի շրջանակում նախատեսվում է ներդնել նաև մոբայլ ID քարտեր, որոնք թույլ են տալիս ձևակերպել անհրաժեշտ փաստաթղթերն ու օգտվել տարբեր էլեկտրոնային ծառայություններից առանց ID քարտի ներկայացման։

«Մենք այսօր պատրաստ ենք տրամադրել էլեկտրոնային ծառայությունների լայն շրջանակ, սակայն բազմաթիվ օգտատերերի մոտ ID քարտերը կարդացող սարքերի բացակայության պատճառով ծրագիրը դեռևս հետաձգվում է», – ասաց Հարությունյանը։

Նա նաև նշեց, որ սա միակ նորարարություն չէ էլեկտրոնային կառավարման ոլորտում, մասնավորապես արդեն մշակվել և ներդրվում է անհատական էլեկտրոնային փոստի տրամադրման համակարգը։

«Նախատեսվում է, որ ծրագրի շրջանակում յուրաքանչյուր քաղաքացի կունենա սեփական պաշտոնական e-mail–ը, որտեղ նա կարող է մուտք գործել ID քարտի կամ էլեկտրոնային ստորագրության միջոցով և օգտվել էլեկտրոնային ծառայություններից», – ասաց Հարությունյանը։ –0–

Ծանոթացեք լուրերին առաջինն ու քննարկեք դրանք մեր Telegram-ում

19:14 24.05.2016