Հայաստանում դյուրացվել է առանց դրոշմապիտակների աուդիո և վիդեո արտադրանքի վաճառքի արգելքը
ԵՐԵՎԱՆ, 22 դեկտեմբերի. /ԱՌԿԱ/. ՀՀ ԱԺ–ն երկուշաբթի արտահերթ նիստի ժամանակ երկրորդ և վերջնական ընթերցմամբ ընդունել է «Հսկիչ նշանների (դրոշմապիտակների) միջոցով մագնիսական, օպտիկական, թվային, լազերային և ցանկացած այլ տիպի էլեկտրոնային կրիչների պարտադիր դրոշմավորման մասին» ՀՀ օրենքն ուժը կորցրած ճանաչելու մասին» օրենքի նախագիծը։
Ինչպես նշել է «Օրենսդրության կարգավորման ազգային կենտրոն» ծրագրերի իրականացման գրասենյակ» պետական հիմնարկի տնօրեն Արմեն Եղիազարյանը, օրենքով ժամանակին խստացվել էր հեղինակային իրավունքների պաշտպանությունը առանց դրոշմապիտակների աուդիո և վիդեո արտադրանքի վաճառքի նկատմամբ արգելք սահմանելու միջոցով։
«Սակայն փորձը ցույց է տվել, որ այդ օրենքի ոչ բոլոր դրույթներն են գործնականում կիրառվում, օրինակ, նախատեսված էր, որ հեղինակային իրավունքների պաշտպանությամբ պետք է զբաղվի Էկոնոմիկայի նախարարությունը` տրամադրելով հեղինակային արտադրանքի իրացման համապատասխան արտոնագրեր, ինչը նպատակահարմար չէ, քանի որ իրենց իրավունքները պետք է պաշտպանեն արտադրանքի հեղինակները», – ասաց Եղիազարյանը։
Նա նաև նշեց, որ ինտերնետի զարգացման և վերջինիս ներթափանցման մակարդակի ավելացման պայմաններում անիմաստ է իրականացնել նման վերահսկողություն շուկայում, որն առանց այդ էլ աստիճանաբար «մահանում է»։
Ինչպես նշեց ՀՅԴ խմբակցության անդամ Արծվիկ Մինասյանը, խմբակցությունը դեմ է օրինագծին, քանի որ այն ժամանակին ընդունվել է հեղինակային իրավունքները պաշտպանելու համար, ինչը բավականին ակտուալ է Հայաստանի համար։
«Առաջարկվող փոփոխությունը` օրենքի չեղյալ հայտարարումը, նշանակում է հետընթաց հեղինակային իրավունքների պաշտպանության գործընթացներում, ինչն անընդունելի է մեր խմբակցության համար», – ասաց Մինասյանը։
Առանց դրոշմապիտակների աուդիո և վիդեո արտադրանքի վաճառքի արգելքը Հայաստանում ուժի մեջ է մտել 2013 թ.–ի ապրիլի 18–ին։–0–
Ծանոթացեք լուրերին առաջինն ու քննարկեք դրանք մեր Telegram-ում
11:59 21.12.2015