Ինչպես ցրտին օգտվել սմարթֆոնից
ԵՐԵՎԱՆ, 27 դեկտեմբերի. /ԱՌԿԱ/. Ձմեռն այնքան էլ լավ ժամանակ չէ սմարթֆոններ ունեցողների համար: Ցուրտ եղանակին մարտկոցի լիցքավորումն արագ նվազում է, էկրանը չի «ընկալում» ձեռնոցներով մատների հպումները, իսկ ձեռքերն արագ սառչում են:
iguides.ru-ն ներկայացնում է խորհուրդներ ցուրտ եղանակկին սմարթֆոնից օգտվողների համար։
Մարտկոց
Աշխատեք չհանել սմարթֆոնը ցրտին առանց խիստ անհրաժեշտության (հատկապես, եթե ջերմաստիճանը շատ ցածր է): Եթե ամեն դեպքում ստիպված եք դա անել, ապա ափով ծածկեք հեռախոսի ներքևի հատվածը, այդպես մարտկոցն ավելի դանդաղ կսառչի: Աշխատեք սմարթֆոնը պահել գրպանում, այլ ոչ թե պայուսակում, և հետևի մասով դեպի մարմինը` ավելի մոտ ջերմությանը:
Ցուրտը վնասակար ազդեցություն է ունենում մարտկոցի վրա, որի տարողությունը կարող է նվազել, իսկ կորպուսը` պատվել մանր ճեղքերով, ինչի հետևանքով հեռախոսը կարող է բռնկվել լիցքավորման ժամանակ։
Էկրանի զգայունությունը
Որոշ սմարթֆոնների վրա (օրինակ, Samsung-ի և Nokia-ի մի շարք մոդելների) կարելի է մեծացնել էկրանի զգայունությունը: Դա լրացուցիչ ծանրաբեռնվածություն է մարտկոցի համար, սակայն թույլ կտա օգտվել սմարթֆոնից ձեռնոցներով (ճիշտ է ոչ շատ հաստ):
Հատուկ ձեռնոցներ
Խանութներում վաճառվում են ձեռնոցներ, որոնք ունեն հատուկ ծածկույթ մատերի ծայրերի վրա: Այդ ծածկույթի մեջ կան հոսանք հաղորդող թելեր, որոնք «ընկալվում են» սենսորային էկրանների կողմից: Չինացիները վաճառում են այդպիսի ձեռնոցները տարբեր գնային կատեգորիաներում` սկսած 100 ռուբլուց մեկ պարկի համար, մինչև` 1000 ռուբլի մեկ զույգի համար:
Լավ փնտրելու դեպքում խանութներում հնարավոր է գտնել հատուկ սփրեյ, որը ցանկացած ձեռնոց վերածում է սենսորայինի:
Կոճակներ և մետաղական թելեր
Որոշ մարդիկ ձեռնոցների մատերից որևէ մեկին կպցնում են կտորի համար նախատեսված մետաղական կոճակ: Նման կոճակներ կարելի է կպցնել գրեթե ցանկացած տիպի ձեռնոցների վրա, դրանք չեն փչացնում ձեռնոցների տեսքը, գրեթե հետք չեն թողնում կտորի վրա և ցանկացած պահի դրանք կարելի է հանել: Նման կոճակով էկրանին դիպչել հարկավոր է ոչ շատ ուժեղ, այլապես կարելի է քերծել ապակին:
Ստիլուս / Գրիչ
Ստիլուսի (գրիչ) օգտագործումը ևս վատ տարբերակ չէ նրանց համար, ովքեր ցանկանում են հարմարավետությամբ օգտվել սմարթֆոնից ցուրտ եղանակին։ Ամենաէժան տարբերակն ունի հաստ ռետինե ծայր, ավելի թանկերինը, որպես կանոն, ավելի բարակ է, սակայն լավագույն տարբերակը ֆիրմային ստիլուսներն են (ինչպես Wacom ապրանքանիշինը), ճիշտ է, դրանք համատեղվում են ոչ բոլոր սմարթֆոնների հետ: -0-
Ծանոթացեք լուրերին առաջինն ու քննարկեք դրանք մեր Telegram-ում
17:22 27.12.2016