Ռոստելեկոմն ընդլայնում է Կապանի քաղաքապետարանի հետ համագործակցությունը
ԵՐԵՎԱՆ, 11 հուլիսի. /ԱՌԿԱ/. Հուլիսի 8-ին Կապանի քաղաքապետարանի հետ հայաստանյան Ռոստելեկոմի ներկայացուցիչները փոխըմբռնման հուշագիր ստորագրեցին` ի նշան կողմերի միջև համագործակցության ամրապնդման և զարգացման, հաղորդում է Ռոստելեկոմի մամուլի ծառայությունը։
Հուշագրում, մասնավորապես, նշվում է, որ հաշվի առնելով 2013թ․-ից համատեղ աշխատանքների արդյունքներն ու ձեռքբերումները`, քաղաքապետարանի հետ համագործակցությունը շարունակվում է՝ ընդգրկելով ոչ միայն ենթակառուցվածքների ստեղծումն ու սպասարկումը, այլ նաև նորերի ձևավորումն ու շահագործումը։
«Առաջիկայում իրականացվելիք նախագծերից են մանկական ժամանակակից խաղահրապարակների կառուցումն ու կահավորումը, ինչպես նաև նոր այգիներում անվճար WiFi հասանելիության ապահովումը», – նշվում է հաղորդագրության մեջ։
Կողմերը կշարունակեն համագործակցել կրթական նախագծերի շրջանակում, ինչպես նաև Ռոստելեկոմը կշարունակի անվճար հիմունքներով ինտերնետ հասանելիությամբ ապահովել քաղաքային էլեկտրոնային գրադարանը ։
Հուշագրի ստորագրմանը հաջորդեց Ռոստելեկոմի վաճառքի և սպասարկման սրահի (ՎՍՍ) վերաբացման պաշտոնական արարողությունը, որին ներկա գտնվեցին Կապանի քաղաքապետ Աշոտ Հայրապետյանը և Ռոստելեկոմ Հայաստանի գլխավոր տնօրեն Հայկ Ֆարամազյանը։
Սրահը գործում է Կապան քաղաքում դեռ 2013թ.-ից և 2016թ.-ին «Ռոստելեկոմի» բրենդային նոր ոճին համապատասխանեցնելու նպատակով վերանորոգվել ու արդիականացվել է` տեղի բնակչությանը առավել ժամանակակից ենթակառուցվածքներով սպասարկելու նպատակով։
Բաժանորդների հոսքը սրահ առավել ակտիվացել է հատկապես ընկերության նոր առաջարկի՝ հատուկ մարզերի բաժանորդների համար նախատեսված «Տրիո» մարզային փաթեթի շնորհիվ, որը հնարավորություն է տալիս ընդամենը 8500 դրամ ամսավճարով դիտել 60-ից ավելի առաջատար հեռուստաալիքներ, ունենալ մինչև 24 Մբ/վ արագությամբ ինտերնետ հասանելիություն, հեռախոսակապ և անվճար WiFi ակտիվացում։
Փաթեթին մասին առավել մանրամասն կարելի է ծանոթանալ` անցնելով հետևյալ հղումով։
«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։ Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–
Ծանոթացեք լուրերին առաջինն ու քննարկեք դրանք մեր Telegram-ում
18:26 11.07.2016