«Ոսկե ծիրանը» կինոտոն կդառնա Հայաստանի համար. Ռ. Յիրիկյան
ԵՐԵՎԱՆ, 10 հուլիսի. /ԱՌԿԱ/. Ծիրանօրհնեքի ավանդական արարողությամբ, ապա հայ անվանի կինոգործիչների շարքում արժանավորների անունը հավերժացնող նոր աստղերի բացմամբ մեկնարկել է տարվա սպասված մշակութային իրադարձությունը՝ «Ոսկե ծիրան» Երևանի 14-րդ կինոփառատոնը:
Համաշխարհային կինոարվեստի շունչն ուղիղ մեկ շաբաթ՝ հուլիսի 9-16-ը կթևածի մայրաքաղաքում:
Շառլ Ազնավուրի հրապարակում իրենց պատվավոր տեղն են զբաղեցրել կինոռեժիսորներ Ֆրունզե Դովլաթյանի, Յուրի Երզնկյանի և կինոօպերատոր Սերգեյ Իսրայելյանի հիշատակը հավերժացնող աստղերը: Անվանի հյուրերը, մրցույթային և արտամրցույթային ծրագրերի մասնակիցներն անցել են կարմիր գորգով: Փառատոնի պաշտոնական բացումը կայացել է «Մոսկվա» կինոթատրոնում:
Ողջույնի խոսքով հանդես են եկել «Ոսկե ծիրան» Երևանի միջազգային կինոփառատոնի հիմնադիր տնօրեն Հարություն Խաչատրյանը և փառատոնի գլխավոր գործընկեր ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, հաղորդում է ՎիվաՍել-ՄՏՍ-ի մամուլի ծառայությունը։
Փառատոնի մեկնարկն ազդարարելուց հետո ներկայացվել են մրցույթային ծրագրում ընդգրկված ֆիլմերը, ինչպես նաև ժյուրիի կազմը:
«Ոսկե ծիրանի» մեկնարկն ազդարարող հանդիսավոր արարողությունից հետո ցուցադրվել է բացման ֆիլմը՝ Համո Բեկնազարյանի «Խասփուշը»:
«Մենք երկար ճանապարհ ենք անցել «Ոսկե ծիրանի» հետ և կարող եմ ասել, որ կինոտոն լինելուց բացի, այս փառատոնը կարևոր առաքելություն է ստանձնել: Արդեն տասնչորս տարի այն փորձում է արվեստի ամենազոր ուժով արթուն պահել մարդու միտքն ու լուսավոր մտածելու ունակությունը, մարդկությանը դարձնել քաղաքակիրթ արժեհամակարգի հետևորդ: Կինոն ազդեցիկ միջոց է միմյանց ճանաչելու, հասկանալու և հարգելու համար: Ողջունում եմ փառատոնի մասնակիցներին, հյուրերին և կինոսեր հասարակությանը՝ մաղթելով հաճելի դիտում և հաջողություն»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
96 երկրից 1100 հայտ ստացած փառատոնը կարող է իրական կինոտոն դառնալ մրցույթային և արտամրցույթային տարբեր ծրագրերում ընդգրկված բազմաժանր ֆիլմերի ասելիքով և ինքնատիպությամբ: Հայաստանի կինոսեր հասարակության համար այս իրադարձությունը բացառիկ հնարավորություն է՝ հայկական և համաշխարհային կինեմատոգրաֆի գլուխգործոցներին հաղորդակցվելու համար:
ՎիվաՍել-ՄՏՍ-ը («ՄՏՍ Հայաստան» ՓԲԸ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-
Ծանոթացեք լուրերին առաջինն ու քննարկեք դրանք մեր Telegram-ում
15:23 10.07.2017
