Հայաստանում Beeline–ի բաժանորդների թիվը 2014 թ.–ին աճել է 11,9%-ով` կազմելով 770 հազար
ԵՐԵՎԱՆ, 5 մարտի. /ԱՌԿԱ/. Հայաստանում Beeline–ի բաժանորդների թիվը 2014 թ.–ին ավելացել է 11,9 տոկոսով` կազմելով ավելի քան 770 հազար` 2013 թ.–ին գրանցված 688 հազարի համեմատ, հինգշաբթի լրագրողներին ասաց «ԱրմենՏել» ՓԲԸ–ի (ապրանքանիշը` Beeline) գլխավոր տնօրեն Անդրեյ Պյատախինը` ներկայացնելով ընկերության ֆինանսական արդյունքներն ու հիմնական ձեռքբերումները։
Նրա խոսքերով` Beeline –ը 2014 թ.–ն ավարտել է բջջային հատվածում բաժանորդների բազայի ավելացմամբ և արտահոսքի զգալի կրճատմամբ։
«2014 թ.–ի արդյունքում բաժանորդների թիվը գերազանցել է 777 000–ը, ինչը 27 հազարով ավել է 2014 թ.–ի երրորդ եռամսյակից և 82 հազար ավել է 2013 թ.–ի վերջից», – նշեց Պյատախինը։
Նրա խոսքերով` 2014 թ.–ի չորրորդ եռամսյակում արտահոսքը կազմել է 10,9 տոկոս, ինչը 1,5 տոկոսով պակաս է 2013 թ.–ի նույն ժամանակահատվածից։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–
Ծանոթացեք լուրերին առաջինն ու քննարկեք դրանք մեր Telegram-ում
17:01 05.03.2015