Հայաստանում Beeline-ը 2015 թ. երրորդ եռամսյակի արդյունքներով գրանցում է հիմնական ֆինանսական ցուցանիշների աճ

ԵՐԵՎԱՆ, 11 նոյեմբերի. /ԱՌԿԱ/.  Հայաստանում Beeline-ն ամփոփել է ընկերության 2015 թ. երրորդ եռամսյակի ֆինանսական և գործառնական արդյունքները, հաղորդում է «ԱրմենՏել» ՓԲԸ–ի (ապրանքանիշը` Beeline) մամուլի ծառայությունը։

Ըստ հաղորդագրության` երրորդ եռամսյակում ընկերության ընդհանուր գործառնական հասույթը կազմել է 30 մլն. դոլար, ինչը 2 մլն.-ով գերազանցում է երկրորդ եռամսյակի և 4 մլն.-ով` ընթացիկ տարվա առաջին եռամսյակի նույն ցուցանիշը:

EBITDA margin ցուցանիշը երրորդ եռամսյակում աճել է 3%-ով` նախորդ տարվա նույն ցուցանիշի համեմատությամբ և կազմել 40,7%: EBITDA ցուցանիշը երրորդ եռամսյակում կազմել է 12 մլն. դոլար, ինչը 1 մլն. դոլարով գերազանցում է երկրորդ եռամսյակի նույն ցուցանիշը և 3 մլն. դոլարով` առաջին եռամսյակի ցուցանիշը:

Ընկերությունը շարունակում է գրանցել բջջային հատվածում բաժանորդային բազայի և բջջային ինտերնետի ծառայություններից ստացված եկամուտի աճ: Այսպես, 2015 թ. երրորդ եռամսյակի արդյունքներով Հայաստանում Beeline բջջային կապի բաժանորդների թիվը գերազանցում է 844 000-ը, ինչը մոտ 30 000-ով գերազանցում է երկրորդ եռամսյակի նույն ցուցանիշը:

Ինչպես նշվում է հաղորդագրության մեջ, բջջային ինտերենտի ծառայություներից ստացված եկամուտը երրորդ եռամսյակում կազմել է 1,54 մլն. դոլար, ինչը 0,16 մլն.-ով գերազանցում է երկրորդ եռամսյակի նույն ցուցանիշը:

«Եռամսյակի հաջող ցուցանիշները խոսում են այն մասին, որ Beeline-ը Հայաստանում շարունակում է նվաճել հաճախորդների վստահությունը` առաջարկելով որակյալ, պարզ և հարմար ծառայություններ: Մեզ համար առանձնապես հաճելի է այն հանգամանքը, որ Beeline-ի ավելի ու ավելի մեծ թվով բաժանորդներ պատրաստ են երաշխավորել մեր ծառայություններն իրենց հարազատներին ու ծանոթներին: Այս մասին են վկայում հաճախորդների շրջանում անցկացված հարցումները», - նշել է Հայաստանում Beeline-ի գլխավոր տնօրեն Անդրեյ Պյատախինը:

Ինչպես նշվում է ընկերության հաղորդագրության մեջ, Beeline բջջային ինտերնետի ծառայություններից օգտվողների թիվը մեկ տարվա ընթացքում աճել է 22 000-ով, իսկ բաժանորդի կողմից հեռախոսով օգտագործվող տրաֆիկի միջին ծավալը նույն ժամանակահատվածում երկու անգամ աճել է: Մեկ տարվա ընթացքում բաժանորդային բազայում սմարթֆոնների մասնաբաժինն ավելացել է 20%-ով, իսկ սմարթֆոնների բաժանորդների կողմից օգտագործվող ինտերնետի ծավալը գրեթե կրկնակի աճ է գրանցել:

«Ընկերության գնահատմամբ սա հիմնականում պայմանավորված է ինտերնետի միացմամբ բրենդային հեռախոսների վաճառքով», – նշվում է հաղորդագրության մեջ։

2015 թ. երրորդ եռամսյակում Beeline-ի կատարած կապիտալ ներդրումները կազմել են 5 մլն. դոլար, ինչը 3 մլն.-ով գերազանցում է ընթացիկ տարվա երկրորդ եռամսյակի նույն ցուցանիշը։

ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ից ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ 

«ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։ –0–

Ծանոթացեք լուրերին առաջինն ու քննարկեք դրանք մեր Telegram-ում

14:03 11.11.2015