Երևանում հունիսի 19–20–ը կանցկացվի DigiTec 2015 8–րդ ամենամյա բիզնես ֆորումը
ԵՐԵՎԱՆ, 15 մայիսի. /ԱՌԿԱ/. Երևանում հունիսի 19–20–ը կանցկացվի DigiTec 2015 8–րդ ամենամյա բիզնես ֆորումը «Խելացի լուծումներ խելացի բիզնեսի համար» կարգախոսի ներքո, ուրբաթ տեղեկացրել է Ինֆորմացիոն տեխնոլոգիաների ձեռնարկությունների միության (UITE) մամուլի ծառայությունը։
Ֆորումի նպատակն է աջակցել գործարար ոլորտի զարգացմանը, ստեղծել արդյունավետ պայմաններ արդի տեխնոլոգիական լուծումների ծանոթացման և փոխանակման համար:
Երկօրյա բիզնես ֆորումի ընթացքում կլինեն լիագումար նիստեր, գործարար ներկայացումներ, ցուցահանդես, սեմինարներ, կլոր սեղաններ, գործարար հանդիպումներ` տեղական ու միջազգային գործարար համայնքի, փորձագետների և պետական մարմինների մասնակցությամբ:
Այս տարվա ֆորումի թեմաներն են՝ տուրիզմ, առևտուր, գյուղատնտեսություն, շինարարություն ու հանքաարդյունաբերություն, ֆինանսաբանկային ոլորտ, էլեկտրոնային առևտուր, առողջապահություն, կրթություն և տրանսպորտ:
Այս տարի ֆորումի ժամանակ առաջին անգամ կանցկացվի խելացի լուծումներ կիրառող ընկերությունների մրցանակաբաշխություն:
Ինչպես նշել է Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը, այսօր արտասահմանյան և դրանց ամենևին էլ չզիջող հայկական ՏՏ ընկերություններն առաջարկում են բազմաթիվ տեխնոլոգիական լուծումներ արդյունավետ բիզնեսի կառավարման համար:
«Խելացի գործարարներն ու ղեկավարները լավ գիտակցում են, որ ձեռներեցության և, առհասարակ, աշխատանքի կառավարման արդյունավետությունն ու անվտանգությունը մեծապես կախված է նաև տեխնոլոգիական լուծումների կիրառումից», – ասել է Վարդանյանը։
Նա նաև նշել է, որ DigiTec բիզնես ֆորումի շրջանակներում առաջին անգամ անցկացվող մրցանակաբաշխությունը հնարավորություն կտա ռեալ գնահատելու ստեղծված պահանջարկի և առաջարկի հարաբերակցությունն ու որակը:
DigiTec բիզնես ֆորումի նպատակն է աջակցել բիզնեսի տարբեր ոլորտներին օպտիմալ տեխնոլոգիական լուծումների որոնման հարցում, ինչպես նաև օգնել տեխնոլոգիական ընկերություններին միևնույն հարթակի շրջանակներում հանդիպումներ կազմակերպելու և պոտենցիալ հաճախորդներին սեփական մշակումները ներկայացնելու հարցում։
Ֆորումի կազմակերպիչներն են Ինֆորմացիան տեխնոլոգիաների ձեռնարկությունների միությունը (UITE) և «ԱրմենՏել» հեռահաղորդակցական ընկերությունը (ապրանքանիշը` Beeline)։ Բիզնես ֆորումն անցկացվում է ՀՀ վարչապետի բարձր հովանու ներքո։ Այս տարի բիզնես–ֆորումին որպես հովանավոր միացել են նաև «ARinteg» ռուսական ընկերությունն ու Կոնվերս բանկը։
DigiTec բիզնես ֆորումի ինֆորմացիոն հովանավորն է «ԱՌԿԱ» լրատվական գործակալությունը։
Հայաստանի ինֆորմացիան տեխնոլոգիաների միությունը (UITE) հիմնադրվել է 2000 թ.–ին` ոլորտում գործող ընկերությունների տնտեսական շահերը պաշտպանելու, բիզնեսի զարգացումը խթանելու, ՏՏ ոլորտի հետազոտությունները խրախուսելու նպատակով։–0–
Ծանոթացեք լուրերին առաջինն ու քննարկեք դրանք մեր Telegram-ում
21:35 15.05.2015